ახალციხის სასამართლოს შენობის დაზიანების გამო სამი პირი დააკავეს

„5 ივლისს ახალციხეში სასამართლოს შენობის დაზიანების ფაქტზე შსს–ს ახალციხის რაიონული სამმართველოს თანამშრომლებმა სისხლის სამართლის კოდექსის 187–ე მუხლით (ნივთის დაზიანება ან განადგურება) დაიწყეს გამოძიება.

აღნიშნულთან დაკავშირებით, სამართალდამცველებმა საქართველოს ადმინისტრაციულ სამართალდარღვევათა კოდექსის 166-ე მუხლით (წვრილმანი ხულიგნობა) 3 პირი დააკავეს: 1982 წელს დაბადებული შალვა ლ, 1992 წელს დაბადებული ბექა თ. და 1983 წელს დაბადებული დავით გ.

საქმეზე გამოძება სხვა დამნაშავე პირების გამოსავლენად სისხლის სამართლის კოდექსის 187–ე მუხლით მიმდინარეობს“, - ნათქვამია შსს-ს განცხადებაში.

შეგახსენებთ, რომ ახალციხის რაიონული სასამართლოს მოსამართლემ გოჩა ჯეირანაშვილმა 3 ივლისს გამამართლებელი განაჩენი გამოუტანა ბორჯომის პოლიციის ყოფილ უფროსს მამუკა ხვედელიანს და მასთან ერთად დაკავებულ პოლიციის კიდევ ოთხ თანამშრომელს. აღნიშნულ პირებს გამოძიება მოქალაქის სკამის ფეხით გაუპატიურებასა და არაადამიანურ მოპყრობაში ედავებოდა. მოსამართლის გადაწყვეტილების გამო საპროტესტო აქციები ახალციხესა და ბორჯომში უკვე სამჯერ გაიმართა. ერთ-ერთ საპროტესტო აქციაზე, რომელიც ახალციხის რაიონულ სასამართლოსთან 5 ივლისს გაიმართა, აქციის მონაწილეებმა სასამართლოს შენობას კვერცხები და პომიდვრები დაუშინეს. როგორც სასამართლოს თანამშრომლები ამბობენ, შენობის ფანჯარას ქცაც მოხვდა, რის გამოც ერთ-ერთი თანამშრომელი დაშავდა.

[თამარ თოთაძე, ახალციხე]