ხვედელიანის გათავისუფლებას ხვალაც გააპროტესტებენ

არასამთავრობო ორგანიზაციის „ადამიანის საყოველთაო დეკლარაციისთვის“ სამცხე-ჯავახეთის რეგიონის კოორდინატორის დავით ბერიძის თქმით, საპროტესტო აქციაში რეგიონის თითქმის ყველა მუნიციპალიტეტის მოქალაქეები, ასევე თბილისიდან ჩამოსული უფლებადამცველები ჩაერთვებიან.

შეგახსენებთ, ახალციხის რაიონულმა სასამართლომ, ბორჯომის პოლიციის ყოფილი უფროსი, "ერთიანი ნაციონალური მოძრაობის" მაჟორიტარი კანდიდატი, მამუკა ხვედელიანი და მისი ოთხი თანამშრომელი, რომელთაც არაადამიანურ მოპყრობაში ედებოდათ ბრალი, 3 ივლისს უდანაშაულოდ სცნო და სასამართლო დარბაზიდან გაათავისუფლა. მომხდარს საპროტესტო აქციების ტალღა მოჰყვა.

4 ივლისს აქცია ბორჯომში გაიმართა, აქციის მონაწილეებმა ბორჯომში ცენტრალური მაგისტრალი გადაკეტეს. 5 ივლისს აქცია ახალციხეში გაიმართა. მონაწილეებმა სასამართლოს ცოცხები, კვერცხები და პომიდვრები დაუშინეს. სასამართლოს შესასვლელი კარი კი ცოცხით ამოქოლეს. დღეს, 6 ივლისს, კი აქცია ბორჯომში მიმდინარეობს. აქციას გოგა ხაინდრავა და ირმა ინაშვილი შეუერთდნენ. ბორჯომში 6 ივლისს გამართულ საპროტესტო აქციაზე დაანონსეს 11 ივლისის აქციაც.

[თამარ თოთაძე, ახალციხე]