ახალციხის სასამართლოსთან გამართული აქციის სამი მონაწილე 100-100 ლარით დააჯარიმეს

სამივე მათგანი გუშინ, 8 ივლისს, საზოგადოებრივი წესრიგის დარღვევის გამო, საქართველოს ადმინისტრაციულ სამართალდარღვევათა კოდექსის 166-ე მუხლით (წვრილმანი ხულიგნობა) დააკავეს.

მათ რამდენიმე წუთის წინ ახალციხის რაიონულმა სასამართლომ ადმინისტრაციული ჯარიმა 100-100 ლარი დააკისრა. არცერთი მათგანი სასამართლოს გადაწყვეტილების გასაჩივრებას არ აპირებს.

სასამართლო პროცესის მიმდინარეობისას მათ სამართალდარღვევის ფაქტი დაადასტურეს და აღიარეს, რომ მათი მხრიდან ნამდვილად იყო: გინება, უცენზურო სიტყვების ძახილი და კვერცხების სროლა. როგორც პროცესზე მათ განმარტეს, გინება არ იყო მიმართული კონკრეტული პირების მიმართ.

„ზოგადად ვიგინებოდით, მოსამართლესთან შეხვედრა გვინდოდა, რომ არ შეგვხვდა, უფრო გავღიზიანდით და სასამართლოს კვერცხები დავუშინეთ“, - განაცხადა შალვა ლ-მ.

ახალგაზრდები ამბობენ, რომ სასამართლოსთვის არც პომიდვრები და არც ქვა არ უსვრიათ: „ვამბობთ, რომ ვიგინებოდით და კვერცხებიც ვისროლეთ, პომიდორი რომ გვესროლა, იმასაც ვიტყოდით“.

დაკავებულებს ადვოკატი არ ჰყავდათ. ამიტომ, მათ სასამართლო პროცესის დაწყებისთანავე მოსამართლის აცილების შესახებ შუამდგომლობა თავად დააყენეს. მათი განცხადებით, სასამართლო არის მხარე, პროტესტი სწორედ ახალციხის რაიონული სასამართლოს უკანონო გადაწყვეტილების გამო გაუჩნდათ და ამიტომ არ მიაჩნიათ მართებულად მათი საქმე ახალციხის სასამართლომ განიხილოს.

სამართალდამრღვევების შუამდგომლობას დაეთანხმა ახალციხის რაიონული სამმართველოს უბნის უფროსი ინსპექტორ-გამომძიებელი პაატა გელაშვილი. თუმცა, დაუსაბუთებლობის გამო მოსამართლე მარიკა ჩიტაშვილმა შუამდგომლობა არ დააკმაყოფილა.

სასამართლო პროცესს ახალციხის პოლიციის თანამშრომლები, ასევე „ქართული ოცნების“ ბორჯომის რაიონული ორგანიზაციის თავმჯდომარის მაოდგილე ზურა ხაჩიძე და სამცხე-ჯავახეთის სამხარეო-მთავარი სამმართველოს უფროსის რევაზ მუმლაძის ძმა გენადი მუმლაძე ესწრებოდნენ.

გენადი მუმლაძისა და ზურა ხაჩიძის განცხადებით, აღნიშნული საქმე ახალციხის რაიონულ სასამართლოს არ უნდა განეხილა.

- „სასამართლო არის მხარე ამ შემთხვევაში, ისაა დაზარალებული, ამიტომ საქმის აცილება თავად მოსამართლესაც კი უნდა შემოეთავაზებინა“, - ამბობს ხაჩიძე.

აცილების შესახებ სამართალდამრღვევებმა სასამართლოს გუშინაც მიმართეს, თუმცა შუამდგომლობა დაკმაყოფილებული არ იქნა.

სამართალდამრღვევები აცხადებენ, რომ ხუთშაბათს, 11 ივლისს, ახალციხის რაიონულ სასამართლოსთან დაგეგმილ აქციაში მონაწილეობას აუცილებლად მიიღებენ.

- „ჯეირანაშვილმა დარბაზიდან ჩვენი ბავშვობის მეგობრის მკვლელი გაათავისუფლა. ამიტომ პროტესტს გავაგრძელებთ“, - განაცხადეს მათ.

[თამუნა უჩიძე, ახალციხე]