ახალციხის რაიონულ სასამართლოსთან, საპროტესტო აქცია, რომელიც 12:00 საათზე იყო დაანონსებული,
13:00 საათზე დაიწყო.
„ამ მოსამართლემ გამოუშვა საქართველოს ჯალათები, მკვლელები, საქართველოს გამყიდველები, რომლებიც აპატიმრებდნენ ხალხს, კლავდნენ და ანადგურებდნენ მთელ საქართველოს. გამოვიდა გარეთ ხვედელიანი, დადის ბორჯომში იარაღჩამოკიდებული და აღიზიანებს ხალხს. მკვლელები გამოუშვა ამ მოსამართლემ და ვითხოვთ, რომ ისიც გვერდით დაუჯდეს მას და ყველა დაისაჯოს“, - ამბობს აქციის მონაწილე დავით როკეტიშვილი.
ბორჯომის გარდა, დღევანდელ აქციაზე მონაწილეები ადიგენიდან და აბასთუმნიდანაც ჩამოვიდნენ.
„აბასთუმნიდან დაახლოებით ასი კაცი მაინც ვიყავით ჩამოსული. მოვითხოვთ სამართლიანობის აღდგენას, რომ სასამართლო იყოს თავისუფალი, ზეწოლისგან გათავისუფლებული და აღარ გვინდა მერაბიშვილისა და კუბლაშვილის სასამართლო“, - ამბობს აქციის ერთ-ერთი მონაწილე ოლეგ მინაძე.
აქციის მონაწილეები მოსამართლე გოჩა ჯეირანაშვილის მიერ გამოტანილი განაჩენს აპროტესტებდნენ და მასთან შეხვედრას ითხოვნდენ. თუმცა, ჯეირანაშვილი აქციის მონაწილეებს არ შეხვდრია.
„ჩვენ ვაპროტესტებთ იმ დიდ უსამართლობას, რაცას ჰქვია უსამართლო სასამართლო. 2012 წლის საპარლამენტო არჩევნებში ჩვენმა საზოგადოებამ "ქართულ ოცნებას" მხარი იმიტომ დაუჭირა, რომ საზოგადოებაში უნდა აღდგენილიყო სამართლიანობის გრძნობა, რასაც ხელს უშლის ორხელისუფლებიანობაში მყოფი პრეზიდენტი და კუბლაშვილი, თავისი ჯიბის სასამართლოთი. გამოუშვეს ისეთი ადამიანი, რომელსაც ბრალი ედებოდა გაუპატიურებაში და უკანონო ქმედებებში“, - ამბობს „ქართული ოცნების“ ბორჯომის რაიონული ორგანიზაციის თავმჯდომარის მოადგილე ზურაბ ხაჩიძე და ამატებს, რომ დღევანდელ აქციას ის ადამიანები შეუერთდნენ, ვისაც სასამართლოს გადაწყვეტილების გამო პროტესტი უჩნდება.
აქციას უფლებადამცველი ორგანიზაციის „ადამიანის უფლებათა საყოველთაო დეკლარაციისთვის“ წევრებიც შეუერთდნენ.
„სანამ ეს ადამიანი არ იქნება დასჯილი და არ აგებს პასუხს, მსგავსი აქციები გაგრძელდება. გარდა ამისა, ყველა, ვინც მონაწილეობა მიიღო ამ ადამიანების გათავისუფლებაში, უნდა დაისაჯოს“, - ამბობს „ადამიანის უფლებათა საყოველთაო დეკლარაციისთვის“ კოორდინატორი სამცხე-ჯავახეთში დავით ბერიძე.
„ეს იყო უკანონო განაჩენი, მოვითხოვთ კუბლაშვილის და სააკაშვილის ჯობის მოსამართლეების მოხსნას, დაინიშნოს ხელახალი სასამართლო“, - ამბობს აქციის მონაწილე გიორგი ჯეირანაშვილი.
აქციის მონაწილეებმა სასამართლოს შენობას კვერცხები, პომიდვრები და ცოცხები დაუშინეს. ერთ-ერთმა მონაწილემ კი სასამართლოს ფანჯარას ქვა ესროლა, რის შედეგადაც მინა ჩაიმტვრა და სასამართლოს ერთი
თანამშრომელი დაშავდა. საქართველოს შინაგან საქმეთა სამინისტროს განცხადებით, ახალციხის რაიონული სასამართლოს შენობის დაზიანების ფაქტზე შსს–ს ახალციხის რაიონული სამმართველოს თანამშრომლებმა საქმე სისხლის სამართლის კოდექსის 187–ე მუხლით (ნივთის დაზიანება ან განადგურება)
აღძრეს.
აქცია ახალციხის რაიონულ სასამართლოსთან დაახლოებით საათნახევრის განმავლობაში მიმდინარეობდა. რაიონული სასამართლოდან მონაწილეებმა პატრულის შენობასთან გადაინაცვლეს, რის შემდეგაც ბორჯომში წასვლა და
გზის გადაკეტვა გადაწყვიტეს. თუმცა, ბორჯომში დაგეგმილი აქცია ხვალამდე გადაიდო.
"არ მიგვაჩნია სწორად ყოველდღე გზოს გადაკეტვა, ეს არ არის სამართლიანი. ჩვენ მოვითხვეთ საქმის ხელახალი გამოძიება და დაველოდებით რამდენიმე დღე პასუხს", - ამბობს "ქართული ოცნების" ბორჯომის ორგანიზაციის თავმჯდომარის მოადგილე ზურა ხაჩიძე.
აქცია ხვალ, 6 ივლისს, 15:00 საათზე ბორჯომის ცენტრში დაიგეგმა. ორგანიზატორების თქმით, აქციას თბილისიდანაც შეუერთდებიან.
ხვალ დაგეგმილ აქციას გოგა ხაინდრავა და ირმა ინაშვილიც შეუერთდებიან. ამის შესახებ მათ დღეს გამართულ ბრიფინგზე განაცხადეს.
[თამარ თოთაძე, ახალციხე]