პაატა ბურჭულაძის ფონდს ახალციხეში ედუარდ კიკნაძე უხელმძღვანელებს

ფოტოზე: ივანე მაჭავარიანი, ედუარდ კიკნაძე და პაატა ბურჭულაძე.
4 თებერვალი, ფონდის ოფისის გახსნა ახალციხეში. ფოტო "ვარლამ წიკლაური

ედუარდ კიკნაძე 1991 წელს, ახალციხეში დაიბადა. საშუალო განათლება ახალციხეში მიიღო, უმაღლესი კი თბილისში, თბილისის სახელმწიფო უნივერსიტეტში საერთაშორისო ურთიერთობების ფაკულტეტი დაამთავრა. ამის შემდეგ, სწავლა საქართველოს საზოგადოებრივ საქმეთა ინსტიტუტში, ჯიპაში გააგრძელა, სადაც საჯარო მმართველობის კუთხით მაგისტრატურა გაიარა. პარალელურად, ორმხრივი შეთანხმების საფუძველზე, პოლონეთში, პოლიტიკურ მეცნიერებებს ეუფლებოდა.

ფონდის რეგინული ორგანიზაციის კოორდინატორად დანიშვნამდე, ბოლოს, 2015 წელს საქართველოს პრეზიდენტის ადმინისტრაციაში გადიოდა სტაჟირებას (2015 წლის მაისიდან აგვისტომდე). იქამდე, 2013–2014 წლებში, არასამთავრობო სექტორში საქმიანობდა. სტუდენტობისას თბილისში მეგობრებთან ერთად არასამთავრობო ორგანიზაცია „კავკასიის ახალგაზრდული კავშირი“ დააფუძნა და 2013 წლის თებერვლიდან 2014 წლის სეტქემბრამდე ორგანიზაციაში პროექტების მენეჯერი იყო.

ამჟამად ცხოვრობს ახალციხეში. ფონდში მუშაობას უკვე შეუდგა.

„ფონდის არსებობა ახალციხეში ძალიან დიდია, ჩვენ ხალხთან ერთად ვაპირებთ შევისწავლოთ არსებული პრობლემები და მოვიფიქროთ მათი გადაჭრის გზები. სამი თვის ვადაში ვიმუშავებთ პრობლემების მოგვარების გზებზე, შემდეგ კი ჩვენს ხედვებს გავუზიარებთ ადგილობრივ ხელისუფლებას და ყველა იმ უწყებას, რომელსაც ეხება“, – ამბობს ფონდის ახალციხის ოფისის კოორდინატორი ედუარდ კიკნაძე.

შეგახსენებთ, დღეს, 4 თებერვალს, ახალციხეში "პაატა ბურჭულაძე - საქართველოს განვითარების ფონდი" გაიხსნა. ფონდის გახსნას მისი დამფუძნებელი, საოპერო მომღერალი პაატა ბურჭულაძე და ფონდის სხვა წევრები ესწრებოდნენ. ფონდის გახსნის შემდეგ, მისი დამფუძნებლები ჯერ ახალციხის ქუჩებში, მოსახლეობას შეხვდნენ, შემდეგ კი მოქალაქეებთან შეხვედრა ახალციხის ციხეში, მესხურ დარბაზში გამართეს.

„საქართველოს განვითარების ფონდი“ ცნობილმა საოპერო მომღერალმა და ფონდ „იავნანას“ პრეზიდენტმა პაატა ბურჭულაძემ დააფუძნა. ფონდის მიზანი "ქვეყნისთვის აქტუალური საკითხების განხილვა და სახელმწიფოებრივად მოაზროვნე დემოკრატიული ძალების კონსოლიდაციაა". მისი აღმასრულებელი დირექტორი პრეზიდენტ გიორგი მარგველაშვილის ყოფილი მრჩეველი ივანე მაჭავარიანია.

[ნინო ნარიმანიშვილი, ახალციხე]