პაატა ბურჭულაძის ფონდმა ახალციხეში ოფისი გახსნა [Photo]

„საქართველოს განვითარების ფონდი“ ახალციხეში 15:00 საათზე, პაატა ბურჭულაძემ ადგილობრივებთან ერთად გახსნა.

„შესანიშნავი ოფისი გაიხსნა ახალციხეში, ბედნიერი ვარ, რომ ასეთი კარგი შეხვედრა გვაქვს. მიხარია, რომ ხალხია მონდომებული იმისთვის, რომ ჩვენი ფონდის ცხოვრებაში ჩაერთოს. ჩვენ უნდა გავერთიანდეთ იმისთვის, რომ ის მდგომარება, რაც არის საქართველოში, შევცვალოთ“, – განაცხადა ფონდის დამფუძნებელმა.

ფონდის გახსნის შემდეგ, პაატრა ბურჭულაძემ და ფონდის სხვა წევრებმა ახალციხის ცენტრალურ პარკში გადაინაცვლეს და ადგილობრივებს გაესაუბრნენ.

მოგვიანებით, ფონდის დამფუძნებლები ახალციხის ციხის ტერიტორიაზე, მესხურ დარბაზში შეკრებილ მოქალაქეებს შეხვდნენ და ფონდის მიზანი გააცნეს.

შეგახსენებთ, „საქართველოს განვითარების ფონდი“ ცნობილმა საოპერო მომღერალმა და ფონდ „იავნანას“ პრეზიდენტმა პაატა ბურჭულაძემ დააფუძნა. ფონდის მიზანი "ქვეყნისთვის აქტუალური საკითხების განხილვა და სახელმწიფოებრივად მოაზროვნე დემოკრატიული ძალების კონსოლიდაციაა".

ორგანიზაციის სახელწოდებააა "პაატა ბურჭულაძე - საქართველოს განვითარების ფონდი". მისი სამეთვალყურეო საბჭოს თავმჯდომარე თავად პაატა ბურჭულაძეა, აღმასრულებელი დირექტორი - პრეზიდენტ გიორგი მარგველაშვილის ყოფილი მრჩეველი ივანე მაჭავარიანი. ორგანიზაციის წესდების მიხედვით, მისი მიზანია წარუდგინოს ფართო საზოგადოებას წინადადებები შემდეგი მიმართულებით: სახელმწიფო მმართველობა და დემოკრატია, კონსტიტუციური საკითხები, ეკონომიკური პოლიტიკა, ადამიანის უფლებები, ჯანდაცვა და სოციალური საკითხები, ენერგეტიკა და გარემოს დაცვა, საგარეო პოლიტიკა, სამოქალაქო შერიგება.

ფონდის რეგიონული ოფისი ახალციხეში, რუსთაველის N69–ში გაიხსნა. ფონდში გაწევრიანება დღეიდან ნებისმიერ მსურველს შეუძლია.







[ვარლამ წიკლაური, ახალციხე]