რა ოდენობის ზარალი მიიღო ბიბლიოთეკამ ჯერ უცნობია

კითხვაზე როდის შეიქმნება ბიბლიოთეკაში გაფუჭებული წიგნების აღსაწერად სპეციალური კომისია, ახალციხის მუნიციპალიტეტის საკრებულოს თვმჯდომარე ოლეგ სანდროშვილი აცხადებს, რომ ჯერ პასუხი არ აქვს.

”ჯერ წიგნები უნდა გადაირჩეს, შესაბამისი დავალება უკვე მიღებული აქვთ. სანამ არ გადაირჩევა რომელი წიგნია ჩამოსაწერი და რომელი არა, ვერაფერს გიპასუხებთ”, - გვითხრა სანდროშვილმა.

მისი თქმით, დაზიანებულ წიგნებს კომისია ვერ ჩამოწერს: ”ამას აუდიტის შეფასება სჭირდება. ამიტომ აუდიტის მოწვევა გვინდა, ეს ხარჯებთან და შესაბამისად ბიუჯეტთანაა დაკავშირებული”.

საკრებულოს თავმჯდომარე ამბობს, რომ გარდა წიგნებისა საკრებულოს ბალანსზე რიცხული სხვა ქონებაცაა ჩამოსაწერი და წიგნებთან ერთად მისი ჩამოწერაც მოხდება.

ჯერ განსაზღვრული არც ისაა, თუ როდის მოიწვევს საკრებულო აუდიტს ქონების ჩამოსაწერად.

შეგახსენებთ, რომ ახალციხის ბიბლიოთეკის სარდაფში წელიწადნახევარია ათასობით წიგნი ლპება. დაზიანებული წიგნების დამუშვება უკვე დაიწყო. ამ ფაქტის გამო სამსახურიდან გაათავისუფლეს ახალციხის კულტურის დაწესებულებათა გაერთიანების დირექტორი ბელა მოდებაძე.

[თამუნა უჩიძე, ახალციხე]