სხვილისის ბიბლიოთეკის წიგნებს ადგილი გამოუძებნეს

ახალციხის მეექვსე საჯარო სკოლის დირექტორმა ზაზა თამარაშვილმა სოფელ ზემო სხვილისიდან წიგნები რამდენიმე დღის წინ გადმოიტანა. წიგნადი ფონდი სკოლის ბიბლიოთეკაში განთავსდა.

ახალციხის მუნიციპალიტეტის გამგეობა და მეექვსე საჯარო სკოლის დირექტორი წიგნებით მას შემდეგ დაინტერესდნენ, რაც "სამხრეთის კარიბჭემ" ამის შესახებ ვრცელი მასალა გამოაქვეყნა და აღმოაჩინა, რომ გამოკეტილ ბიბლითეკაში წიგნებს წვავდნენ.

შეგასხენებთ სხვა ასობით ბიბლიოთეკის მსგავსად, სხვილისის ბიბლიოთეკაც 2006 წლიდან გაუქმდა. 2008 წლიდან ყველა გაუქმებულ ბიბლიოთეკაში არსებული წიგნები იმავე სოფლის ან ახლომდებარე საჯარო სკოლებს გადაეცათ. სხვილისის ბიბლიოთეკის წიგნადი ფონდიც ახალციხის მეექვსე საჯარო სკოლას დაეწერა. სკოლას წიგნების გადატანის ვალდებულება არ აუღია. წიგნადი ფონდი სოფელში უნდა დარჩენილიყო, სკოლას მათი მოვლა-პატრონობა ევალებოდა.

მეექვსე საჯარო სკოლის დირექტორის თქმით სხვილისის ბიბლიოთეკაზე მეთვალყურეობა მათი სურვილი არ იყო, სკოლას ამის არც მატერიალური საშუალება ჰქონდა და არც კადრები ჰყავდა.

ამ ხნის განმავლობაში სხვილისის ბიბლიოთეკაში წიგნებს უპატრონოდ ეყარა. 5,000 წიგნიდან 2,000-მდე დარჩა. წიგნების ნაწილი გაიძარცვა, ნაწილი კი დაიწვა.

[მანანა სარაშვილი, ახალციხე]

ამავე თემაზე შეგიძლიათ იხილოთ სტატია, რა ინფორმაცის ფლობდნენ ადგილობრივ ხელისუფლებაში სხვილისის ბიბლიოთეკაზე.