ადგილობრივ ხელისუფლებაში სხვილისის ბიბლიოთეკაზე არაფერი იციან

კულტურის დაწესებულებათა გაერთიანებაში ამბობენ, რომ მათ დაქვემდებარებაში მხოლოდ ქალაქის ბიბლიოთეკა და ორი დასახლების, აწყურისა და ვალეს მოქმედი ბიბლიოთეკებია, რომლებიც 2008 წელს აამოქმედეს.

„ჩვენი სამსახური 2007 წელს ჩამოყალიბდა, ზემო სხვილისის ბიბლიოთეკა კი უფრო ადრე გაუქმდა. ჩვენს დაქვემდებარებაში მხოლოდ მოქმედი ბიბლიოთეკებია“,-ამბობს ახალციხის კულტურის დაწესებულებათა გაერთიანების დირექტორი გიორგი ჟუჟუნაძე, რომელიც ამ პოსტზე მიმდინარე წლის 5 ივნისიდან დაინიშნა.

აქვე შეგახსენებთ, რომ მისი პირველი დაპირება დაზიანებული წიგნების გადარჩენას ეხებოდა. კერძოდ, ჟუჟუნაძემ პირობა დადო, რომ მაქსიმალურად ეცდება, ახალციხის ცენტრალური ბიბლიოთეკის სარდაფში დაზიანებული წიგნები გადაარჩინოს და საცავში ვენტილაციის სისტემის მოწყობაზე იზრუნოს.

სხვილისის ბიბლიოთეკის შენობა ახალციხის მუნიციპალიტეტის ქონებაა. თუმცა, რა მდგომარეობაშია შენობა, ან მასში დაცული წიგნები, ინფორმაცია არც მუნიციპალიტეტის გამგეობაში აქვთ. სხვილისის ბიბლიოთეკაში არსებული სიტუაციის შესახებ გამგებელმა "სამხრეთის კარიბჭესგან" შეიტყო და დაგვპირდა, რომ ამ ფაქტით დაინტერესდებოდა.

„ეს ამბავი უყურადღებოდ არ დაგვიტოვებია. რას მოვუხერხებთ ჯერ არ ვიცით, სავარაუდოდ, რომელიმე სხვა სკოლას გადავცემთ ამ წიგნებს“, - გვითხრა ახალციხის მუნიციპალიტეტის გამგებელმა.

შეგახსენებთ, სხვილისის გაუქმებული ბიბლიოთეკიდან წიგნების ნაწილი გაძარცვეს, ნაწილი კი დაწვეს. დაწვის ფაქტს "სამხრეთის კარიბჭეც" შეესწრო.

[მანანა სარაშვილი, ახალციხე]