კულტურის დაწესებულებათა გაერთიანების დირექტორად გიორგი ჟუჟუნაძე დაინიშნა

ჟუჟუნაძემ ამ თანამდებობაზე ბელა მოდებაძე შეცვალა, რომელიც ბიბლიოთეკის საცავში დამპალი წიგნების გამო, მიმდინარე წლის 3 ივნისს გაათავისუფლეს.

გიორგი ჟუჟუნაძე 1961 წლის 12 თებერვალს ახალციხის მუნიციპალიტეტის სოფელ მუსხში დაიბადა. 1978 წელს მუსხის საშუალო სკოლა დაამთავრა, რის შემდეგაც თბილისში, სერგო ზაქარიაძის სახელობის კულტურულ-საგანმანათლებლო სასწავლებელში ჩააბარა, სარეჟისორო მიმართულებით. ორი წლის განმავლობაში თბილისის ფილარმონიაში მუშაობდა. ამის შემდგომ სწავლა განაგრძო ეკონომიკის ინსტიტუტში.

„სწავლის დამთავრების შემდგომ, 1986 წლიდან მუშაობა გავაგრძელე შინაგან საქმეთა სამინისტროს ორგანოებში. ბოლოს სანებართვო სისტემის ინსპექციის უფროსი ვიყავი. 2007 წელს გამათავისუფლეს სამსახურიდან და მას შემდეგ უმუშევარი ვიყავი“, - ამბობს გიორგი ჟუჟუნაძე.

2008 წლიდან იგი რესპუბლიკური პარტიის წევრი იყო. ხოლო მას შემდეგ, რაც ახალციხეში კოალიცია „ქართული ოცნების“ შტაბი გაიხსნა, მასში გაწევრიანდა და შეხვედრების მთავარ კოორდინატორად განაგრძო მუშაობა.

„გავიგე, რომ აღნიშნულ თანამდებობა ვაკანტური იყო. დავინტერესდი და განცხადება შემოვიტანე. ამ სფეროში გარკვეული გამოცდილება მაქვს და ვფიქრობ, რომ ჩვენი სამსახური ბევრ კარგ საქმეს გააკეთებს“, - ამბობს კულტურის დაწესებულებათა გაერთიანების ახალი დირექტორი.

ჟუჟუნაძე საკადრო ცვლილებების განხორციელებას არ აპირებს.

„პოლიტიკური ნიშნით თანამშრომლებს არ გავათავისუფლებ. 43 თანამშრომელია, ჯერ ყველას კარგად არ ვიცნობ. ვნახავ, ვის რა განათლება აქვს, ვის რა გამოცდილება, ამის მიხედვვით მივიღებ გადაწყვეტილებებს",- ამბობს იგი.

[თამარ თოთაძე, ახალციხე]