ადიდებულმა ხევმა ახალციხეში მიქელაძეების სახლი დატბორა

ხევი დავითისა და კონსტანტინეს ქუჩაზე, 22 მაისს, დღის მეორე ნახევარში, ადიდდა.

„საღამოს ექვსი საათი იქნებოდა, სახლში ვიყავით ყველა. ჩემი სახლი ხევთან ძალიან ახლოსაა და ადიდებულმა წყალმა პირდაპირ კედელს დაარტყა. აქ სახლს ვაშენებთ და ეზოში რაც კი იყო ბლოკი, რკინები თუ ცემენტი, ყველაფერი წყალმა წაიღო“, – გვიყვება დავითისა და კონსტანტინეს ქუჩაზე N13–ში მცხოვრები შორენა ცინაძე.

მისი თქმით, პირველ სართულზე ავეჯი დასველდა, თუმცა მისი გამოტანა დროულად მოასწრეს: „პატარა ფარდული გვაქვს გვერდით და ჩემმა მეუღლემ იქ გაიტანა. დროულად მოვასწარით ღორის და ქათმების გამოყვანა, თორემ მათაც წყალი წაიღებდა“.

ახალციხის მერიაში ამბობენ, რომ დავითისა და კონსტანტინეს ქუჩაზე სტიქიის შედეგად ცინაძეებისთვის მიყენებული ზარალი გუშინვე შეისწავლეს: „დღეს დილიდან ტექნიკა მათ ეზოში მუშაობს და ქვა–ღორღისგან გაწმენდაში ვეხმარებით“.

შეგახსენებთ, რომ 22 მაისს მოსულმა უხვმა ნალექმა ახალციხის მუნიციპალიტეტის სოფლები დააზიანა. დაიტბორა ადგილობრივების ნაკვეთები წყალთბილაში, სხვილისსა და ვალეში, ე.წ. მეორე შახტის დასახლებაში. ასევე, დაზიანდა შიდა გზები და ხიდები.





[ლუბა გიორგაძე, ახალციხე]