ადიდებულმა მდინარემ სოფელ არალში ნაკვეთები დატბორა

ძლიერი წვიმის შედეგად ადიგენში, სოფელ არალში მდინარემ ორი ადგილობრივის სახლი, ასობით ჰექტარი და სოფლამდე მისასვლელი გზა დატბორა.

„მეტრანახევარზე მაინც მოდიოდა წყალი გზაზე. სამაშველოში დავრეკეთ მაგრამ არავინ მოსულა. ასობით ჰექტარი სოფელში წყლით დაიფარა“, – გვიყვება არალში მცხოვრები ზურაბ ჩილინგარაშვილი.

მისი თქმით, მიუხედავად იმისა, რომ 112–ზე არა ერთხელ დარეკეს, სოფელში ტრაქტორი საათნახევრის შემდეგ გამოჩნდა.
„მდინარე ქვაბლიანში უნდა გადაეგდოთ წყალი, მაგრამ ეს ისე გვიან დაწიყეს, რომ ნათესები სულ განადგურდა“.

სამაშველო სამსახურში კი აცხადებენ, რომ დღის განმავლობაში მათთან 309 შეტყობინება შევიდა და რეაგირება ყველა მათგანზე მოხერხდა, თუმცა აქვე ამატებენ, რომ რიგ ღონისძიებებს პროიროტეტების მიხედვით ახორციელებენ: „რაც ყველაზე სასწრაფოა, ჯერ იმას ვაკეთებთ“.

შეგახსენებთ, რომ დღეს, 10 ივნისს სოფელ ვარხანსა და სოფელ აბასთუმანში წყალდიდობის გამო ათობით სახლი დაიტბორა, რის გამოც ადგილობირვების ევაკუაცია განხორციელდა.

[თამუნა უჩიძე, ადიგენი]