ახალციხეში შიდა გზების რეაბილიტაცია მიმდინარეობს

ახალციხის მუნიციპალიტეტის გამგეობამ საქართველოს რეგიონული განვითარების და ინფრასტრუქტურის სამინისტროში 25 ინფრასტრუქტურული პროექტი გააგზავნა, სამინისტრომ პირველ ეტაპზე მხოლოდ 11 პროექტი დააფინანსა.

ერთ-ერთი პროექტი ახალციხეში: სარაჯიშვილის, ხაშურის, მარჯანიშვილის, წმინდა დავითისა და კონსტანტინეს, პეტრიწის, გვარამაძის, სააკაძისა და მებაღიშვილის ქუჩების გზების რეაბილიტაციაა.

აღნიშნულ ქუჩებზე სამუშაოები უკვე დაიწყო. ამ ეტაპზე წმინდა დავითისა და კონსტანტინეს ქუჩაზე ასფალტის პირველი საფარი დაგებულია, დანარჩენ ქუჩებზე ჯერ გზის მოხრეშვა-მოსწორება, ტროტუარების, სანიაღვრე და საკანალიზაციო ჭების მოწესრიგება მიმდინარეობს.

გზების რეაბილიტაციას ტენდერში გამარჯვებული შპს „არალი“ ახორციელებს. სამუშაოებისთვის 1,927,600 ლარია გამოყოფილი. კომპანიამ სამუშაოები მიმდინარე წლის 11 ნოემბერს უნდა დაასრულოს.

ახალციხის მუნიციპალიტეტის გამგებლის ბესიკ ბლიაძის თქმით, აღნიშნულ ქუჩებზე გარე განათების დამონტაჟებაც იგეგმება.

[მანანა სარაშვილი, ახალციხე]