„აღარც ღობეებია აღარც ნათესები“–წყალდიდობის შედეგად დაზარალებულები დახმარებას ითხოვენ [photo/video]

წყალთბილაში მცხოვრები ადგილობრივების განმარტებით, ხევის ადიდება სავარაუდოდ მთაში მოსულმა უხვმა ნალექმა გამოიწვია. მოვარდნილი ღვარცოფი სოფელ წყალთბილაში ორი ადგილობრივის ეზოში შევარდა.

„ადიდებული მდინარე მოდიოდა ჩემს ეზოში. დიდი ლოდები და მოგლეჯილი ხეები მოჰქონდა. ყველაფერი წაიღო რაც ეზოში მქონდა. აღარც ღობეა, აღარც ნათესები“, – ამბობს სოფელ წყალთბილაში მცხოვრები სიმონ ვართანიანი.

მოვარდნილმა წყალმა ამავე სოფელში მცხოვრები ნანა ხიზაძის საცხობიც დააზიანა. ღვარცოფმა შენობის კედელი ჩამოანგრია.

„საცხობში ვიყავი, ფეხებქვეშ რყევა ვიგრძენი, როგორც მიწისძვრის დროს ისეთი. გამოვედი გარეთ და კედელიც ჩამოინგრა. რომ არ გამომესწრო შეიძლება მეც ჩავვარდნილიყავი.მონიტორი, ცომის მოსაზელი, ტელეფონი, წყლის გამაცხელებელი არისტონი და რამდენიმე ტომარა ფქვილი წაიღო წყალმა“, – ამბობს ნანა ხიზაძე.

ღვარცოფისგან მოგლეჯილი ხეები და ლოდები წყალმა წყალთბილის ახალგაზრდული ცენტრის ეზომდე ჩაიტანა. დატბორა ცენტრის ეზო და საპირფარეშოები,ასევე ადგილობრივების ნათესები.



ადიდებულმა ხევმა ჯერ ვალის „მეორე შახტასთან“ დამაკავშირებელი ხიდის ორი ბურჯი დააზიანა, შემდეგ კი კარტოფილის ნათესები. ამ დროისთვის ხიდზე გადაადგილება შეზღუდულია.

ადგილობრივები ამბობენ, რომ ძლიერი წყალი „მეორე შახტაში“ დაახლოებით 15:00 საათისთვის მოვარდა. წყლის ძლიერმა ნაკადმა ნათესებში რამდენიმე საათი იდინა.

„რვა მეასედზე მეთესა კარტოფილი, მთლიანად დაფარა წყალმა. ყოველ წელს უნდა გაწმენდა ამ ხევს და არავინ წმენდს“, – ამბობს რაინდი ფცქიალაძე.

დატბორილია ნუგზარ პაპიძის კარტოფილის ნაკვეთიც:"ნახევარი ნათესი განადგურებულია, ახლოს ვერ მივდივარ რომ ვნახო რა ხდება“.

"მეორე შახტის" მიმდებარე ტერიტორიაზე მიწის ნაკვეთები სხვილისის და ვალეში მცხოვრებ მოსახლეობას ეკუთვნის. ადგილობრივები ამბობენ, რომ მსგავსი პრობლემა თითქმის ყოველ წელს აქვთ, თუმცა ასეთი მასშტაბის სტიქია აქამდე არ ყოფილა.

„40 მეასედზე მეთესა, ქვა–ღორღია შესული. ნაკვეთი ნაქირავები მაქვს და არცერთი კომპანია მიზღვევს, რადგან მესაკუთრეს ნაკვეთი გაფორმებული არ აქვს. დღეს დაახლოებით 2000 ლარი ვიზარალე“, – ამბობს ვალეში მცხოვრები ავთო ხითარიშვილი.

მოსახლეობის უმეტესობას ნათესები დაზღვეული არ აქვს. დაზარალებულები დახმარებას ადგილობრივი ხელისუფლებისგან ითხოვენ.

„ვეცნობით ვითარებას, შევისწავლით ზარალს და იმის შემდეგ ვიმოქმედებთ“, – განაცხადა სამცხე–ჯავახეთის გუბერნატორმა კახა სამხარაძემ.
სტიქიის ზონაში გუბერნატორთან ერთად იმყოფებოდნენ ადგილობრივი თვითმმართველობის თანამშრომლები, ასევე სამაშველო სამსახურის წარმომადგენლები და სამართალდამცავები.

„მობილიზებულია სპეცტექნიკა და იწმინდება მდინარის კალაპოტი იმისთვის, რომ ზარალის მასშტაბი არ გაიზარდოს. დაწყებულია მიყენებული ზარალის აღრიცხვა. ძირითადად დაზიანებულია ნათესები და ხეხილი. შეისწავლის კომისია და შესაბამის პრევენციას გავატარებთ“, – ამბობს ახალციხის მუნიციპალიტეტის მერი ზაზა მელიქიძე.









[თინათინ ზაზაძე, ახალციხე]