ძლიერმა სეტყვამ და წვიმამ სოფელ ანდაში ადგილობრივები დააზარალა

ადგილობრივების თქმით, 22 მაისს, დღის მეორე ნახევარში ძლიერი წვიმა თითქმის ნახევარ საათს გაგრძელდა.

„სეტყვაც და წვიმაც ერთდროულად იყო. სოფლის გზა ხრეშით იყო მოსწორებული და მოვარდნილმა ნიაღვარმა მთლიანად წაიღო. სეტყვამ სულ გააფუჭა ჭანჭურები, ტყემლები“, – გვიყვება ადგილობრივი გურამ ბერიძე.

ანდაში ძლიერი ნალექის გამო დაიტბორა ეზოები და სარდაფები.

„სარდაფში რაც მეწყო ყველაფერი წყალში ტივტივებდა. ჭურჭლის ნაწილი გამოვიტანე და გადავარჩინე რომ არ დამტვრეულიყო“, – ამბობს ანდაში მცხოვრები ნინო ივანიძე.

ანდაში მერის წარმომადგენელი დავით ინასარიძე კი აცხადებს, რომ სოფელში წვიმა იყო, თუმცა სეტყვა არ ყოფილა: „არ ვიცი ვინ თქვა, რომ სოფელში სეტყვა იყო. წვიმა იყო, მაგრამ არაფერი დაუზიანებია“.

ახალციხის მერიაში აცხადებენ, რომ ანდაში სტიქიით მიყენებულ ზარალს სპეციალურად შექმნილი კომისია შეისწავლის.

შეგახსენებთ, რომ 22 მაისს, უხვმა ნალექმა ახალციხეში კიდევ სამი სოფელი წყალთბილა, სხვილისი და ვალეში ე.წ. მეორე შახტის დასახლება დაზარალდა. ქალაქში კი წვიმისაგან ადიდებულმა ე.წ ღრელის წყლებმა მიქელაძეების სახლი დატბორა.







[ლუბა გიორგაძე, ახალციხე]