საკადრო ცვლილება სამცხე–ჯავახეთის საოლქო პროკურატურაში

სამცხე–ჯავახეთის საოლქო პროკურორის უკვე ყოფილი მოადგილე გიორგი ბახტაძე. ფოტო: "სამხრეთის კარიბჭე"

სამცხე–ჯავახეთისა და აჭარის საოლქო პროკურატურებში ახალდანიშნული პროკურორები სამსახურეობრივი უფლებამოსილების შესრულებას დღეიდან, 14 ნოემბრიდან შეუდგნენ.

სამცხე–ჯავახეთის ოლქის პროკურორის მოადგილე გიორგი ბახტაძე ბათუმის რაიონულ პროკურორად დაინიშნა, ბათუმის რაიონული პროკურორი გიორგი მოსაშვილი კი სამცხე–ჯავახეთის საოლქო პროკურატურის საგამოძიებო ნაწილის უფორსი გახდა.

ამ დროისთვის სამცხე–ჯავახეთის ოლქის პროკურორის მოადგილის პოზიცია ვაკანტურია. ამ თანამდებობაზე გიორგი ბახტაძე 2014 წლის ოქტომბრიდან დღემდე მუშაობდა. მანამდე კი ის, 2013 წლის ნოემბრიდან, სამცხე–ჯავახეთის საოლქო პროკურატურის საგამოძიებო ნაწილის უფროსი იყო. მას შემდეგ რაც ბახტაძე ოლქის პროკურორის მოადგილედ გადაიყვანეს, ეს პოზიცია ვაკანტური იყო და გიორგი მოსაშვილი სწორედ ამ თანამდებობაზე დანიშნეს.

მოსაშვილი ბათუმის რაიონულ პროკურორად 2014 წლის პირველი აგვისტოდან მუშაობდა.

მან პროკურატურაში მუშაობა 2000 წელს დაიწყო. 2002 წლამდე იყო ხაშურის რეგიონული სატრანსპორტო პროკურატურის სტაჟიორი. იმავე წელს მუშაობა განაგრძო ხაშურის რეგიონული ტრანსპორტის პროკურორის თანაშემწედ. 2002-2004 წლებში იყო თბილისის რეგიონული ტრანსპორტის პროკურორის უფროსი თანაშემწე იყო. 2004-2005 წლებში მუშაობდა ქ. თბილისის მთაწმინდა-კრწანისის რაიონული პროკურორის თანაშემწედ. 2005-2007 წლებში ეკავა ქ. თბილისის მთაწმინდა-კრწანისის რაიონული პროკურატურის პროკურორის თანამდებობა. 2007-2008 წლებში იყო ქ. თბილისის ძველი თბილისის რაიონული პროკურატურის პროკურორი. 2008-2012 წლებში მუშაობა განაგრძო ქ. თბილისის ძველი თბილისის რაიონული პროკურატურის პროკურორად. 2012-2013 წლებში მუშაობდა საქართველოს მთავარი პროკურატურის საგამოძიებო ნაწილის განსაკუთრებით მნიშვნელოვან საქმეთა გამომძიებლად. 2013-2014 წლებში ეკავა ქ. თბილისის პროკურატურის საგამოძიებო ნაწილის უფროსის მოადგილის თანამდებობა.

[თამუნა უჩიძე, ახალციხე]