ახალციხის მუნიციპალიტეტში გამგებლის მოადგილე შეიცვალა

მალხაზ ჟუჟუნაძე აღნიშნულ თანამდებობაზე ოფიციალურად მიმდინარე წლის 10 მაისს დაინიშნა. გამგეობაში განმარტავენ, რომ ჟუჟუნაძე გამგებლის მოადგილის პოსტზე კონკურსის გამოცხადებამდე დარჩება. ჟუჟუნაძემდე ამ პოსტზე ავთანდილ თელიაშვილი მუშაობდა.

”ვინაიდან, გამგეობის იურისტმა თორნიკე ხმალაძემ თანამდებობა საკუთარი განცხადების საფუძველზე დატოვა, ავთანდილ თელიაშვილმა სურვილი გამოთქვა, რომ იურიდიულ სამსახურში გადაგვეყვანა. შესაბამისად, მისი თანამდებობა ვაკანტური გახდა”, - განმარტავს ახალციხის მუნიციპალიტეტის გამგებლის მრჩეველი იურიდიულ საკითხებში გოჩა პარუნაშვილი.

აღნიშნულ თანამდებობაზე ვაკანსია 8 მაისს გამოცხადდა.

”რვა მაისსვე დავწერე განცხადება, 9 მაისს გაგებელმა გამომიძახა და მითხრა, რომ თანხმა იყო ამ სამსახურში დამეწყო მუშაობა. ისევე, როგორც გამგეობის ყველა თანამშრომელი, მეც კონკურსის გამოცხადებამდე დავრჩები სამსახურში. თუმცა, კონკურსში მონაწილეობას აუცილებლად მივიღებ”, - ამბობს მალხაზ ჟუჟუნაძე.

კვალიფიციური და გამოცდილი პიროვნება - ასე ახასიათებს ახალ მოადგილეს იურიდიული სამსახურის უფროსი.

მალხაზ ჟუჟუნაძემ 1991 წელს პოლიტექნიკური ინსტიტუტი დაამთავრა. ასევე, დაამთავრებული აქვს ივანე ჯავახიშვილის სახელობის თბილისის სახელმწიფო უნივერსიტეტის ბიზნესის უმაღლესი სკოლა, საერთაშორისო უთიერთობებისა და საგარეო ვაჭრობის სპეციალობით, ხოლო 2000-2005 წლებში ამავე უნივერსიტეტის იურიდიული ფაკულტეტი.

”1991 წელს დავიწყე შრომითი საქმიანობა.1994 წლამდე ახალციხის რაიონის გამგეობაში სოც. უზრუნველყოფის განყოფილების მთავარ სპეციალისტად ვმუშაობდი. შემდგომ სახელმწიფო განყოფილების მთავარ სპეციალისტად. 1994 წელს სამართალდამცავ სტრუქტურებში დავიწყე მუშაობა, კერძოდ რაიონულ პოლიციაში, კორუფციასთან და ეკონომიკურ დანაშაულთა ბრძოლის განყოფილების უფროსად. აღნიშნული განყოფილების გაუქმების შემდეგ სამმართველოში იგივე განყოფილება ჩამოყალიბდა, სადაც ყველა საფეხური გავიარე. ვიყავი უფროსი ინსპექტორი, განსაკუთრებით მნიშვნელოვან საქმეთა ინსპექტორი, სამმართველოს უფროსის მოადგილე და შემდეგ სამმართველოს უფროსი”, - ამბობს მალხაზ ჟუჟუნაძე.

სამართალდამცავ სტრუქტურებში 2005 წლამდე მუშაობდა. 2005 წელს №37 ახალციხის საოლქო საარჩევნო კომისიის თავმჯდომარედ დაინიშნა, სადაც 2007 წლამდე მუშაობდა. 2007 წლის 4 ნოემბერს ნარკოტიკული საშუალებების უკანონოდ შენახის ფაქტზე დააკავეს.

”პოლიტიკური ნიშნით დამაკავეს და დღემდე ვდაობ ამ საკითხთან მიმართებაში, რომ კანონიერად მოხდეს ამ საქმის შესწავლა”, - ამბობს ჟუჟუნაძე.

[თამარ თოთაძე, ახალციხე]