საგანგაშოა თუ არა ბავშვებში გავრცელებული ვირუსული ინფექცია

ბოლო პერიოდში რესპირატორული ვირუსით ძირითადად 0-3 წლამდე ბავშვები ინფიცირდებიან.

”უნიმედი სამცხე” ახალციხის სამედიცინო დაწესებულების პედიატრის, ბავშვთა ინფექციონისტის ნესტან უშხვანის თქმით, საავადმყოფოში მომართვიანობამ იმატა და ეს სეზონს უკავშირდება: ”ყოველწლიურად ზაფხულის დასაწყისში ვირუსული ინფექციების გავრცელების ალბათობა იზრდება და შესაბამისად პაცინეტთა რაოდენობაც მატულობს. თუმცა, ვერ ვიტყვი, რომ პაციენტთა რაოდენობა საგანგაშოდაა გაზრდილი”.

უშხვანი დაინფიცირებულ ადამიანებს, სახლში დარჩენას ურჩევს: ”დავირუსებული ადამიანი ინფექციის გადამტანია. ამიტომ უმჯობესია საზოგადოებრივი თავშეყრის ადგილებს მოერიდოს, რათა სხვაც არ დააინფიციროს. ასეთ პერიოდში ხალხმრავლობას ჯანმრთელი ადამიანიც უნდა ერიდოს, ან პირბადით იაროს. მოგეხსენებათ, ვირუსი ჰაერწვეთოვანი გზით გადადის და გადადების ალბათობა დიდია”.

მისივე თქმით, რესპირატორული ვირუსი განსაკუთრებულ საფრთხეს არ წარმოადგენს: ”ეს ჩვეულებრივი ვირუსია. დაინფიცირებულმა მაღალი სიცხის შემთხვევაში სიცხის დამწევი საშუალება უნდა მიიღოს, ასევე ბევრი სითხე და ვიტამინებით მდიდარი საკვები. აუცილებელია, ავადმყოფის ოთახი ნიავდებოდეს და ლაგდებოდეს სველი წესით. გართულებების შემთხვევაში უნდა მიაკითხონ ექიმს”.

ახალციხის საზოგადოებრივი ჯანმრთელობის დაცვის ცენტრში აცხადებენ, რომ რესპირატორული ვირუსის კერა არ არსებობს და შესაბამისად საგანგაშოც არაფერია.

[ნინო ზედგინიძე, ახალციხე]