როგორ დავიცვათ თავი ვირუსული ინფექციებისგან

მიუხედავად იმისა, რომ ტემპერატურამ საგრძნობლად მოიმატა, მედიკოსების თქმით, გამოზაფხულება ჯერ ნაადრევია. მითუმეტეს, რომ სწორედ ამ პერიოდში იზრდება სხვადასხვა ვირუსული ინფექციების გავრცელების საფრთხე. ამას ისიც ემატება, რომ ადამიანს იმუნიტეტი დაქვეითებული აქვს და ორგანიზმი სხვადასხვა დაავადებებს ვერ უმკლავდება.

ინფექციები განსაკუთრებით ბავშვებისთვის, ხანდაზმულებისა და იმ ადამიანებისთვისაა საშიში, რომლებიც ქრონიკული დაავადებების მატარებლები არიან. ამიტომ, ექიმები გვირჩევენ, რომ მცირე გაცივების შემთხვევაშიც კი სიმპტომები უყურადღებოდ არ დავტოვოთ. საჭიროა მივიღოთ c ვიტამინი და დიდი რაოდენობით სითხე. მაღალი სიცხის შემთხვევაში აუცილებელია მივიღოთ სიცხის დამწევი პრეპარატები.

თუ გრიპი რამდენიმე დღის განმავლობაში არ გაივლის, კლინიკა ”ჯანმრთელობის სახლის” ექიმი-იფექციონისტის ანაიდა ლოკიანის თქმით, აუცილებლად უნდა მივმართოთ ექიმს: ’გართულებების შემთხვევაში სახლის პირობებში მკურნალობა დაუშვებელია. დაავადება შეიძლება გართულდეს და სხვა მძიმე შედეგები გამოიწვიოს’.

რესპირატორიულ ინფექციათა რიცხვს მიეკუთვნება H1N1-ც. ლოკიანის განმარტებით, H1N1, რომელსაც ’ღორის გრიპის’ სახელით ვიცნობთ, ჩვეულებრივი გრიპის მსგავსია და ახასიათებს შემდეგი სიმპტომები: ცხელება, ხველა, ყელის, კუნთებისა და სახსრების, თავის ტკივილი, შემცივნება, საერთო სისუსტე, ზოგჯერ დიარეა და პირღებინება. ისევე, როგორც სეზონური გრიპისას, დაავადებას ხანდახან ახასიათებს მძიმე მიმდინარეობა. იშვიათად, მაგრამ არის შემთხვევები როცა მტავრდება პაციენტის გარდაცვალებით.

-’ეს არის ყველაზე მძიმე ვირუსი, რომლის გამოვლენის შემთხვევაში სასწრაფოდ უნდა მიმართონ ექიმს’, - ამბობს ანაიდა ლოკიანი.

შეგახსენებთ, რომ H1N1-ის ინფიცირების ლაბორატორიულად დადასტურებული 8 ახალი შემთხვევა გამოვლინდა. ამის შესახებ სააგენტო "ინტერპრესნიუსს" დაავადებათა კონტროლისა და საზოგადოებრივი ჯანმრთელობის ეროვნული ცენტრიდან აცნობეს. სულ ლაბორატორიულად დადასტურებულია 80 შემთხვევა. სამი პაციენტი გარდაიცვალა. სავარაუდოდ, გრიპის სეზონი საქართველოში თებერვლის ბოლოსთვის უნდა დასრულდეს.

იმისათვის, რომ თავი დავიცვათ გრიპის ვირუსისაგან, ექიმების რჩევები უნდა გავითვალისწინოთ: უნდა ჩავიცვათ სეზონის შესაფერისად, უნდა მივიღოთ ვიტამინებით გამდიდრებული პროდუქტი, საკვები რაციონი უნდა იყოს მრავალფეროვანი, უნდა მივიღოთ დიდი რაოდენობით სითხე და ბოსტნეული.

ექიმი ინფექციონისტი ანაიდა ლოკოიანის თქმით ნატურალური წვენები უნდა შევინახოთ დახურულ მინის ჭურჭელში, მზისგან მოშორებით, რადგან მზის სხივის მოხვედრის შემთხვევაში ვიტამინი C იშლება. ასევე მუდმივად უნდა გავანიავოთ სახლი, დავიცვათ ჰიგიენა და ვაკონტროლოთ ოთახის ტემპერატურა. მისივე თქმით, აუცილებელია მოვერიდოთ სტრესულ სიტუაციებს, რადგან ნებისმიერი სტრესი იმუნიტეტის დაქვეითების ფაქტორია.



[ნინო ბერიძე, ახალციხე]