რეკომენდაციები H1N1 ვირუსის, ე.წ. ღორის გრიპის პრევენციისთვის

რა არის H1N1 ვირუსი, იგივე „ღორის გრიპი“?

გრიპის სეზონი ყოველი წლის მე–40 კვირას იწყება და მომდევნო წლის მე–20 კვირას მთავრდება. გავრცელებული ვირუსები კი სამ ძირითად A, B და C ჯგუფებად იყოფა. ამჟამად საქართველოში A ტიპის ვირუსია გავრცელებული. H1N1 ვირუსი შესაძლოა ორ კვირამდე გაგრძელდეს, განსაკუთრებით საშიში კი ვირუსით გამოწვეული გართულებებია. მათ შორის საყურადღებოა პნევმონია (ე.წ. ფილტვების ანთება), რაც ხშირად ლეტალური შედეგის მომტანია. ვირუსი განსაკუთრებით საშიშია იმ ადამიანებისთვის, რომელთაც აქვთ ფილტვის ქრონიკული დაავადება, ღვიძლის, თირკმლის ან გულის დაავადება, ასთმა, დიაბეტი, აივ/შიდსი, ასევე მაღალ რისკ ჯგუფს მიეკუთვნებიან 19 წლამდე და 65 წელს ზემოთ მყოფი პირები, ორსულები და ბავშვები.

როგორ გავიგოთ H1N1 ვირუსი შეგვეყარა თუ უბრალოდ გავცივდით?

ჩვეულებრივი გაციებისგან განხსვავებით, გრიპის სიმტომები უცბად ჩნდება და თან ახლავს მაღალი სიცხე, ასევე ყელის ან თავის ტკივილი. შესაძლოა კუნთების და სახსრების ტკივილიც.



რეკომენდაციები

• ხშირად დაიბანეთ ხელი საპნით, ან დაიმუშავეთ სპირტიანი სადეზინფექციო საშუალებებით;

• დეზინფექცია ჩაუტარეთ იმ ნივთებს, რომლებსაც ხშირად იყენებთ;

• მოერიდეთ ხალხმრავალ და საზოგადოების თავშეყრის ადგილებს, სადაც მეტია შანსი დაინფიცირებულ ადამიანთან კონტაქტის;

• ეცადეთ ხელით არ შეეხოთ თვალს, ცხვირსა და პირს;

• მიიღეთ ანტივირუსული პრეპარატები ექიმის დანიშნულებით (ანტივირუსული პრეპარატები არ არის ანტიბიოტიკები);

• მიიღეთ დიდი რაოდენობით სითხე და მიირთვით ისეთი პროდუქტი, რომელიც მდიდარია ვიტამინებით;

• რეკომენდირებულია სამუშაო სივრცის და თავშეყრის ადგილების სველი წესით დამუშავება და ხშირი განიავება;

როგორ მკურნალობენ H1N1 ვირუსით დაინფიცირების შემთხვევაში

• გრიპის სამკურნალოდ იყენებენ ანტივირუსულ პრეპარატებს, განსაკუთრებით ეფექტურად კი პრეპარატი „ტამიფლუ“ მიიჩნევა. მკურნალობაში ანტივირუსული პრეპარატების გამოყენების გადაწყვეტილება აუცილებლად ექიმმა უნდა მიიღოს.

• პაციენტი უნდა იმყოფებოდეს სახლში და სასურველია იწვეს მშვიდ გარემოში, ფიზიკური და ფსიქოლოგიური დატვირთვის გარეშე.

• მნიშვნელოვანია დაცემინებისა და ხველების დროს ერთჯერადი ხელსახოცის აფარება და ხელების ხშირი დაბანა.

[sknews.ge]