ვალეში რეაბილიტირებული ბაღი ხუთთვიანი დაგვიანებით გაიხსნა

ვალეში საბავშო ბაღი, სადაც 210 აღსაზრდელია, გუშინ, 12 მარტს, საზეიმოდ გახსნეს.

შენობას ადგილობრივი ბიუჯეტიდან, ასევე მაღალმთიანი დასახლებების განვითარების ფონდიდან გამოყოფილი თანხით სრული რეაბილიტაცია ჩაუტარდა. მისი შეკეთება 600 000–მდე ლარი დაჯდა.
შეიღება კედლები და ჭერი, მოეწყო ლამინატისა და კერამიკული ფილების იატაკი, მოწესრიგდა სველი წერტილები, საკანალიზაციო სისტემა და ელექტრო გაყვანილობა და შეიღება შენობის გარე-ფასადი.

ბაღს ახალი ავეჯი, სამზარეულოს ტექნიკა და ყველა სხვა საჭირო ინვენტარი, საერთაშორისო ორგანიზაცია World Vision-მა და ახალციხის მუნიციპალიტეტის მერიამ შეუძინეს.

ვალის ბაღში სწავლა სარემონტო სამუშაოების გამო 2017 წლის 9 ივნისს შეწყდა და ამავე წლის 20 სექტემბერს უნდა განახლებულიყო. თუმცა, მშენებელი კომპანიის ხელმძღვანელის ნუგზარ სარაშვილის ჯანმრთელობის მდგომარეობის გაუარესების გამო, სამშენებლო სამუშაოები სახელშეკრულებო პირობებით გათვალისწინებულ ვადაში ვერ დასრულდა. მაშინ მერიამ შპს „ქრისტინე სარაშვილი“ დააჯარიმა. მას ყოველდღიურად 950 ლარის გადახდა დააკისრა.

გასული წლის ბოლოს ვალეს საბავშვო ბაღის მშენებლობაზე დასაქმებულმა მუშებმა საპროტესტო აქციები გამართეს. ისინი აცხადებდნენ, რომ ხელფასებს დროულად ვერ იღებდნენ. აქციებიდან მესამე დღეს, ერთ–ერთი მათგანი ნაქირავებ ბინაში გარდაცვლილი ნახეს. მაშინ მშენებელმა, ნუგზარ სარაშვილმა, შექმნილი ვითარება მუნიციპალიტეტის რეორგანიზაციით ახსნა. სარაშვილი აცხადებდა, რომ სხვადასხვა დოკუმენტების და სახაზინო კოდების განახლებისა და შეცვლის გამო ხელფასების დარიცხვა დროში გაჭიანურდა.

ვალეში ორი საბავშვო ბაღი ფუქნციონირებს. მეორე საბავშვო ბაღი ე.წ. მეორე შახტის დასახლებაშია.

ბაღის გახსნის ცერემონიას სამცხე-ჯავახეთის მხარის გუბერნატორი აკაკი მაჭუტაძე, ახალციხისა და ადიგენის მაჟორიტარი დეპუტატი გიორგი კოპაძე, ახალციხის მუნიციპალიტეტის მერი ზაზა მელიქიძე და World Vision–ის სამცხე-ჯავახეთის სამხარეო განვითარების პროგრამის კოორდინატორი ნინო ლომიძე ესწრებოდნენ.






ფოტოები: © ახალციხის მუნიციპალიტეტის მერია


[sknews.ge]