‘მეორე შახტაში’ ახალი საბავშვო ბაღი გაიხსნა

პროექტი ახალციხის მუნიციპალიტეტისა და პარტნიორი არასამთავრობო ორგანიზაცია World Vision-ის ერთლობრივი ძალებით განხორციელდა.
შენობის სრულ რეაბილიტაციას 67 ათასი ლარი მოხმარდა. კეთილმოეწყო სათამაშო და საძინებელი ოთახები, სამზარეულო და სველი წერტილები, სრულად შეიცვალა კარ–ფანჯარა და იატაკი, მოპირკეთდა გარე ფასადი და ეზო, ასევე ეზოში მოეწყო საბავშვო გასართობი მოედანი. ბაღი ახალი ავეჯით, სათამაშოებით, ყველა საჭირო ინვენტარითა და ტექნიკით აღიჭურვა.

საბავშვო ბაღის გახსნის ცერემონიალს სამცხე-ჯავახეთის მხარის გუბერნატორი აკაკი მაჭუტაძე, ადგილობრივი თვითმმართველობისა და არასამთავრობო ორგანიზაცია World Vision-ის წარმომადგენლები ესწრებოდნენ.

„მას შემდეგ რაც სახელმწიფომ სკოლამდელი აღზრდის დაფინანსების ვალდებულება აიღო, ამ მხრივ მოთხოვნილება განსაკუთრებით გაიზრდა. სწორედ ამიტომ საბავშვო ბაღების მშენებლობა-რეაბილიტაცია გახდა ჩვენი ერთ-ერთი მთავარი პრიორიტეტი“, – განაცხადა გახსნის ცერემონიალზე მხარის გუბერნატორმა.

ახლადგახსნილ საბავშო ბაღში, რომელიც 40 - მდე აღსაზრდელზეა გათვლილი, 7 ადგილობრივი მოსახლე დასაქმდა.

ადგილობრივები ბაღის გახსნას დადებითად აფასებენ. ბოლო ათეული წლების განმავლობაში აქ სკოლამდელი აღზრდის დაწესებულება არ ფუნქციონირებდა და ამის გამო მოშორებით მდებარე საბავშვო ბაღში უწევდათ პატარების ტარება.

სულ მუნიციპალიტეტის მასშტაბით ცხრა საბავშვო ბაღი ფუნქციონირებს, სადაც 450 აღსაზრდელია. გასულ წელს რეაბილიტაცია ჩაუტარდა აწყურის, აგარის, მუსხისა და სხვილისის საბავშვო ბაღებს. მთლიანად სამცხე–ჯავახეთში კი ამ ეტაპზე სკოლამდელი აღზრდის 57 დაწესებულება ფუნქციონირებს, სადაც სასწავლო-აღმზრდელობით პროცესს 4500-მდე ბავშვი ეუფლება. ბოლო პერიოდში მხარის მასშტაბით რეაბილიტაცია ჩაუტარდა 23 ბაგა-ბაღს, მოხდა მათი ინვენტარითა და სხვა საჭიროებებით უზრუნველყოფა. ეს არის უკვე მე-5 ახალი საბავშვო ბაღი, გარდა ამისა წლის ბოლომდე დასრულდება მხარის მასშტაბით კიდევ 6 საბავშვო ბაღის მასშტაბური რეაბილიტაცია.







[sknews.ge]