მუსხში საბავშვო ბაღი გაიხსნა

ბაღის გასახსნელად Mercy Corps–მა ყოფილი კოლმეურნეობის ადმინისტრაციის შენობას სრული რეაბილიტაცია ჩაუტარა. სათამაშოებისა და ინვენტარის შეძენაზე კი World Vision-მა იზრუნა.

„ამ სოფელში აქამდე არასოდეს ყოფილა საბავშვო ბაღი“, – ამბობს Mercy Corps-ის წარმომადგენელი ნინო ლომიძე.

მისივე თქმით, შენობის რეაბილიტაცია 68.000 ლარამდე დაჯდა. აქედან 80 პროცენტი Mercy Corps-ის, დანარჩენი კი ადგილობრივი თვითმმართველობის წილი იყო.

„მუსხის მოსახლეობას დიდიხანია უნდოდა საბავშვო ბაღი, მხოლოდ ბიუჯეტის სახსრებით ამას ვერ ვახერხებდით. ეს საბავშვო ბაღი არის ერთ-ერთი საუკეთესო ჩვენს მუნიციპალიტეტში“, - განაცხადა ახალციხის მუნიციპალიტეტის საკრებულოს თავმჯდომარემ ოლეგ სანდროშვილმა.

საბავშვო ბაღში, რომელიც 50 აღსაზრდელზეა გათვლილი, ამ ეტაპზე 40 პატარაა რეგისტრირებული.

„ამჟამად ორი ჯგუფი გვაქვს, 2-დან 4-წლამდე და 4-დან 6 წლამდე ბავშვებისთვის“, – ამბობს მუსხის საბავშვო ბაღის მენეჯერი მარი ოქრომელიძე.

მუსხში ამბობენ, რომ სოფელში საბავშვო ბაღის გახსნით ბევრი ოჯახის პრობლემა მოგვარდება.

„ბაღი უფრო ადრე უნდა გახსნილიყო, სოფელში ბევრი მცირეწლოვანი ბავშვია. ჩემი ორი შვილიშვილი სკოლაში ისე მივიდა, რომ ბაღში არ უვლიათ, მესამეს კი გაუმართლა“, - ამბობს მუსხის მკვიდრი მარალა გვარამაძე.

საბავშვო ბაღის გახსნის ცერემონიას Mercy Corps-ის, World Vision-ის სამხარეო ადმინისტრაციისა და ადგილობრივი თვითმმართველობის წარმომადგენლები ესწრებოდნენ. საბავშვო ბაღის აღსაზრდელები სტუმრებს ლექსებითა და სიმღერებით დახვდნენ.



[მანანა სარაშვილი, ახალციხე]