ზარზმაში საბავშვო ბაღი გაიხსნა

სოფელ ზარზმაში საბავშვო ბაღი დღეს, 17 ოქტომბერს გაიხსნა. სკოლამდელი აღზრდის დაწესებულებაში სწავლა სამიდან ექვს წლამდე ბავშვებს შეეძლებათ. ახლადაშენებულ ბაღში 8 თანამშრომელია დასაქმებული.

„27 ბავშვი უკვე გვყავს. ჯერ სოფელ ზარზმის მოსახლეობის განცხადებებს დავაკმაყოფილებთ და შემდეგ სხვა სოფლებიდანაც მივიღებთ პატარებს“, – ამბობს ზარზმის საბავშვო ბაღის მენეჯერი ლიანა გოგრიჭიანი.

სკოლამდელი აღზრდის დაწესებულების მშენებლობა 91 ათასი ლარი დაჯდა. აქედან 51 ათასი World Vision–მა დახარჯა, 40 ათასი კი ადიგენის მუნიციპალიტეტის გამგეობამ. ახლადაშენებული ბაღი ინვენტარითა და სათამაშოებით World Vision–მა აღჭურვა, რაშიც 13 ათასი ლარი დაიხარჯა.

ბაღის გახსნას მხარის გუბერნატორის მოადგილე ავთანდილ კაჭკაჭიშვილი, ადიგენის მუნიციპალიტეტის გამგებელი და World Vision –ის წარმომადგენლები დაესწრნენ.

ადიგენის მუნიციპალიტეტში 8 საბავშვო ბაღი ფუნქციონირებს: ზარზმაში, ადიგენში, ბოლაჯურში, ორი ბაღი უდეში, ვარხანში, აბასთუმანსა და არალში.









[თინათინ ზაზაძე, ადიგენი]