ვალეში მუშებმა სახელფასო ანაზღაურების მოთხოვნით აქცია გამართეს [Video]

ვალეში, კულტურის სახლისა და საბავშვო ბაღის ეზოში 20–ზე მეტი შეიკრიბა. მათი თქმით, ბოლო ოთხი თვეა კუთვნილი ხელფასი არ მიუღიათ.

„ოთხ თვეზე მეტია ამ დღეში ვართ. ხან 50 ლარს მოგვცემენ და ხან 100 ლარს. მშენებელი კომპანიის წარმომადგენელსაც ველაპარაკეთ ამაზე და მერიაც საქმის კურსშია, მაგრამ ყურადღებას არავინ გვაქცევს“, – ამბობენ აქციის მონაწილეები.

მათი თქმით, საბავშვო ბაღშიც და კულტურის სახლშიც სარემონტო სამუშაოების ძირითადი ნაწილი დასრულებულია, თუმცა ორივე შენობაში რიგი სამუშოები კვლავ დარჩენილია: „აღარ გავაგრძელებთ მუშაობას, თუ ყურადღებას არ მოგვაქცევენ გზასაც გადავკეტავთ. ოჯახები მშივრები გვყავს, ყოველ დღე გვპიირდებიან რომ ხელფასს გადაგვიხდიან, მაგრამ მიზეზები არ ელევათ“.

ვალეში კულტურის სახლსაც და საბავშვო ბაღსაც შპს „ქარისტინე სარაშვილი“ არემონტებს. ახალციხის მუნიციპალიტეტის გამგეობის მიერ გამოცხადებული ტენდერი მას კულტურის სახლზე 146 472 ლარად აქვს მოგებული, საბავშვო ბაღის რეაბილიტაციისთვის კი 576 000 ლარი უნდა დახარჯოს.

კომპანიის ხელძღვანელი ნუგზარ სარაშვილი აქციის მონაწილეებთან მივიდა და მათ დაპირდა, რომ კუთვნილ ხელფასს აუცილებად მიღებენ, თუმცა ზუსტი თარიღის დასახელება არ შეუძლია, ამას მიზეზი კი ისაა, რომ „ახლა საახალწლო პერიოდია“.

სარაშვილის თქმით, დამკვეთის, ანუ ახალციხის მერიის მიერ თანხა უკვე დარიცხულია: „ხარვეზები არ არის არსად. ფულმა ხაზინა უნდა გაიაროს“.

კომპანიის ხელძღვანელი აცხადებს, რომ სამუშოების ძირითადი ნაწილი დასრულებულია, მიუხედავად ამისა, პროექტებს დროულად მაინც ვერ აბარებს: „მეორე ეტაპისთვის საქვაბეები გვაქვს საყიდელი და გვიან ჩამოდის. ახალი წლის მერე ჩავაბარებთ“.

ახალციხის მუნიციპალიტეტის მერიაში ამბობენ, რომ მათ კომპანიას თანხა უკვე გადაურიცხეს: "მაქსიმუმ ორ დღეში ეს თანხა კომპანიის ანგარიშზე დაჯდება".



შეგახსენებთ, რომ ვალეს საბავშვო ბაღში სარემონტო სამუშაოები 20 სექტემბერს უნდა დასრულებულიყო, პარალელურად კი გარე ფასადის რემონტი გაგრძელებულიყო. ამ დრომდე კი საბავშვო ბაღში რემონტი მიმდინარეობს. როგორც ახალციხის მუნიციპალიტეტის მერიაში აცხადებენ, ვადის გადაცილების გამო კომპანია დააჯარიმეს.



[sknews.ge]