გამოკითხვა: უნდა გაიზარდოს თუ არა ბორჯომის მერიაში ხელფასები [Video]

ბორჯომის მუნიციპალიტეტის მერიის თანამშრომლები მესამე თვეა უხელფასოდ მუშაობენ. ამ საკითხთან დაკავშირებით ბორჯომის საკრებულოსა და მერიის თანამშრომლებს შორის ვითარება ისე დაიძაბა, რომ მხარეები ერთმანეთს ფიზიკურადაც დაუპირისპირდნენ.



შეგახსენებთ, რომ ბორჯომის მერიაში ვითარება 28 თებერვალს, საკრებულოს იმ სხდომის შემდეგ დაიძაბა, რომელზეც მერიის ხელფასების გაზრდის საკითხი დადებითად ვერ გადაწყდა. ამის გამო მერიის თანამშრომლებმა იმ დღეს, საკრებულოს თავმჯდომარე კაბინეტში გამოკეტეს. მეორე დღეს კი გამოაცხადეს, რომ გაიფიცნენ, და საპროტესტო აქცია გამართეს. აქციის მონაწილეები რიგგარეშე სხდომის დანიშვნას, ასევე საკრებულოს თავმჯდომარის გადადგომას ითხოვდნენ.

ოპოზიცური პარტიების დეპუტატები აცხადებენ, რომ ხელფასების მომატებას ისინი მხარს არ დაუჭერენ. მიუხედავად ამისა, მერიამ საკრებულოს განსახილველად უკვე მესამედ ისევ გაზრდილი ხელფასების ნუსხა წარუდგინა. სხდომა ცხრა მარტს დაინიშნა.

ასევე, შეგახსენებთ, რომ ბორჯომის საკრებულო, საქართველოს მასშტაბით ერთადერთია, სადაც მმართველ პარტია "ქართულ ოცნებას" უმრავლესობა არ ჰყავს. ბორჯომის საკრებულოს 28 დეპუტატიდან, 13 "ქართულ ოცნებას", 15 კი ოპოზიციას წარმოადგენს.

[თინათინ ზაზაძე, ოთარ აწყურელი – ბორჯომი]