ჩხუბით დასრულდა სხდომა ბორჯომში, რომელსაც პირველად ესწრებოდა ‘ოცნება’

საკრებულოს სხდომა, რომელზეც, 27 საკითხს შორის, ერთ–ერთი საშტატო ნუსხისა და სახელფასო ანაზღაურების დამტკიცება იყო, დღეს, 28 თებერვალს, 12:00 საათზე დაიწყო. თავდაპირველად სხდომას მხოლოდ ოპოზიციური პარტიების წევრი 15 დეპუტატი ესწრებოდა. რამდენიმე საკითხის განხილვის შემდეგ, კი, რამდენიმეთვიანი ბოიკოტის შემდეგ, სხომაზე მმართველი გუნდის, „ქართული ოცნების“ 11 დეპუტატიც შევიდა. მათ შესვლას სხდომაზე მერიის თანამშრომლები, რომლებსაც ამ წელიწადში ჯერ ხელფასი არ აუღიათ, საკითხის დაუმტკიცებლობის გამო, ტაშით შეხვდნენ.

მიუხედავად ამ წარმომადგენლობითი დასწრებისა (დღეს "ოცნებამ" რამდენიმეთვიანი ბოიკოტის რეჟიმი დაასრულა), ხელფასების საკითხი ვერც დღეს დამტკიცდა.

სხდომაზე მყოფი 26 დეპუტატიდან საკითხის დამტკიცებას მხარი მხოლოდ "ქართული ოცნების" 11-მა დეპუტატმა დაუჭირა, 15 ოპოზიციონერი დეპუტატის უარის გამო საკითხი ჩავარდა, რასაც სხდომაზე ხმაური მოჰყვა. დეპუტატები ერთმანეთს სიტყვიერად დაუპირისპირდნენ.

საკრებულოს სხდომის დასრულების შემდეგ, მერიის თანამშრომლები და „ქართული ოცნების“ დეპუტატები საკრებულოს თავმჯდომარესთან შევიდნენ, იმ არგუმენტების მოსასმენად, რატომ აარ უჭერენ მხარს ხელფასების მატებას. ეს შეხვედრა ამ წუთებშიც გრძელდება და როგორც ‘სამხრეთის კარიბჭეს’ ჟურნალისტი იტყობინება, ხმაურის ფონზე მიმდინარეობს.




პარალელურად, შენობის ფოიეში დეპუტატების ნაწილი ერთმანეთს უკვე ფიზიკურადაც დაუპირისპირდა. დაუდასტურებელი ინფორმაციით, ერთ–ერთი დეპუტატი დაშავდა, „სამხრეთის კარიბჭე“ ამ ფაქტის გადამოწმებას ცდილობს.




შეგახსენებთ, რომ ბორჯომის საკრებულოში უმრავლესობაში ოპოზიციური პარტიის დეპუტატები არიან, ოპოზიციური ფლანგიდანაა საკრებულოს თავმჯდომარეც – ზაზა ჩაჩანიძე, „პატრიოტთა ალიანსიდან“.

ამ ფაქტის გამო, ახალი მოწვევის საკრებულოში, პირველივე სხდომა ხმაურით დაიწყო, რასაც შემდეგ ‘ქართული ოცნების“ დეპუტატების ბოიკოტი მოჰყვა. პარალელურად, უკვე ხუთჯერ ჩავარდა ქვორუმის არარსებობის გამო, რიგგარეშე სხდომა ბორჯომში, რომელსაც მხოლოდ ოპოზიცია ესწრებოდა და რომელზეც მერიის თანამშრომლების ხელფასების მატების საკითხი უნდა განეხილათ. ამ ჩავარდნების გამო, კი მერიის 125 თანამშრომელს ორი თვეა ხელფასი არ აუღია.

[თინათინ ზაზაძე, ნინო ნარიმანიშვილი, ბორჯომი]