ბორჯომის მერმა და მერიის თანამშრომლებმა გაფიცვა შეწყვიტეს

ბორჯომის მუნიციპალიტეტის მერიის საზოგადოებასთან ურთიერთობის სამსახურში აცხადებენ, რომ სამსახურში ყველა თანამშრომელი გამოცხადდა და მუშაობას ჩვეულ რეჟიმში აგრძელებენ.

"ვღებულობთ მოქალაქეებსაც. რიგგარეშე სხდომის დანიშვნის მოთხოვნით საკრებულოს მერიიდან დღის ბოლომდე მივმართავთ", – აცხადებენ მერიაში.

მერია საკრებულოს კვლავ გაზრდილ ხელფასებს წარუდგენს დასამტკიცებლად თუ დოკუმენტს საკრებულოს შენიშვნების მიხედვით დააკორექტირებს ჯერ უცნობია.

"ჯერ არაფერი ვიცით რა როგორ იქნება", – გვითხრეს ბორჯომის მუნიციპალიტეტის მერიის საზოგადოებასთან ურთიერთობის სამსახურში.

ბორჯომის მუნიციპალიტეტის საკრებულოს თავმჯდომარე ზაზა ჩაჩანიძე, 29 თებერვალს, იმ დღეს როცა "ოცნებამ" საპროტესტო აქცია გამართა, აცხადებდა, რომ საკრებულო მერიასთან მოლაპარაკებას აწარმოებდა. რაზე შეთანხმდნენ მხარეები უცნობია. ჩაჩანიძემ მოუცლოლობის გამო "სამხრეთის კარიბჭეს" სატელეფონო ზარებს არ უპასუხა, მერიაში კი ამბობენ, "ამის შესახებ არაფერი იციან".

შეგახსენებთ, რომ ბორჯომის მერიაში ვითარება 28 თებერვალს, საკრებულოს იმ სხდომის შემდეგ დაიძაბა, რომელზეც მერიის ხელფასების გაზრდის საკითხი დადებითად ვერ გადაწყდა. ამის გამო მერიის თანამშრომლებმა იმ დღეს, საკრებულოს თავმჯდომარე კაბინეტში გამოკეტეს. მეორე დღეს კი გამოაცხადეს, რომ გაიფიცნენ, და საპროტესტო აქცია გამართეს. აქციის მონაწილეები რიგგარეშე სხდომის დანიშვნას, ასევე საკრებულოს თავმჯდომარის გადადგომას ითხოვდნენ.

[sknews.ge]