ხელფასებთან დაკავშირებით ბორჯომის მერია და საკრებულო პოზიციებს არ ცვლიან

ბორჯომის მუნიციპალიტეტის მერიის საფინანსო–საბიუჯეტო სამსახურს დოკუმენტი, რომელსაც საკრებულოს დღეს, ხუთ მარტს 18:00 საათმდე გადაუგზავნის მზად აქვს. მერიაში აცხადებენ, რომ ხელფასებთან დაკავშირებით მათი პოზიცია უცვლელია და თანხის მატებას იგივე რაოდენობით ითხოვენ, როგორც ეს წარმოდგენილი გასულ სხდომებზე ჰქონდათ.

„ერთადერთი მხოლოდ მერის ხელფასი რჩება იგივე 2 650 ლარი, ანუ 2017 წელს რაც იყო განსაზღვრული. ლევან ლიპარტია არ ითხოვს ხელფასის მომატებას“, – აცხადებენ ბორჯომის მუნიციპალიტეტის მერიაში.

ისევე როგორც მერიის, ასევე უცვლელია ბორჯომის საკრებულოს უმრავლესობის პოზიციაც.

„ჩვენ ისევ არ დავუჭერთ მხარს ხელფასების იმ ოდენობით გაზრდას როგორც ეს მერიაში სურთ. თანამდებობის პირებისთვის მაქსიმუმ 200 ლარით მატებაზე ვიყოთ თანახმა. რაც შეეხება რიგით თანამშრომლებს, მათთვის ხელფასების გაზრდას მანამდეც ვუჭერდით მხარს და არც ახლა ვიქნებით წინააღდეგი“, – აცხადებს ბორჯომის მუნიციპალიტეტის საკრებულოს თავმჯდომარე ზაზა ჩაჩანიძე და ამატებს, რომ სხდომას მიმართვიდან ერთი კვირის ვადაში დანიშნავს.

ბორჯომის მუნიციპალიტეტის მერის მოადგილის ბუბა ბერიძის განცხადებით, იმ შემთხვევაში თუ ხელფასების საკითხზე შეთანხმება ვერ მოხერხდება, შესაძლოა თვითმმართველობაში ვითარება ისევ დაიძაბოს: „ვერავის მოვთხოვ უხელფასოდ იმუშაოს. მესამე თვეა თანამშრომლებს ხელფასები არ მიუღიათ. არ გამოვრიცხავ, რომ მათი მხრიდან პროტესტი კვლავ განახლდეს“.

შეგახსენებთ, რომ ბორჯომის მერიამ სამდღიანი პროტესტი შემდეგ მუშაობა დღეს, ხუთ მარტს განაახლა.

ასევე, შეგახსენებთ, რომ ბორჯომის მერიაში ვითარება 28 თებერვალს, საკრებულოს იმ სხდომის შემდეგ დაიძაბა, რომელზეც მერიის ხელფასების გაზრდის საკითხი დადებითად ვერ გადაწყდა. ამის გამო მერიის თანამშრომლებმა იმ დღეს, საკრებულოს თავმჯდომარე კაბინეტში გამოკეტეს. მეორე დღეს კი გამოაცხადეს, რომ გაიფიცნენ, და საპროტესტო აქცია გამართეს. აქციის მონაწილეები რიგგარეშე სხდომის დანიშვნას, ასევე საკრებულოს თავმჯდომარის გადადგომას ითხოვდნენ.


[sknews.ge]