ბორჯომის მერიის ხელფასებზე საკრებულო 31 იანვარს იმსჯელებს

ბორჯომის მუნიციპალიტეტის საკრებულოში რიგგარეშე სხდომა დანიშნეს. როგორც მუნიციპალიტეტის საკრებულოს თავმჯდომარის მოადგილე გიორგი გოგიჩაიშვილის აცხადებს, სხდომის ჩანიშვნის მიზეზი თვითმმართველობაში ხელფასების გაცემასთან დაკავშირებული პრობლემები არ ყოფილა: „სხვა საკითხები გვაქვს განსახილველი, მაგრამ ბუნებრივია ხელფასების შესახებაც ვიმსჯელებთ“.

ბორჯომის მუნიციპალიტეტის მერიაში ამბობენ, რომ იმის შესახებ, თუ რა ფორმით მიაწოდონ ხელფასები საკრებულოს დასამტკიცებლად, ამ წუთებშიც მუშაობენ. მერიაში არ გამორიცხავენ, რომ შრომითი ანაზღაურების მატებასთან დაკავშირებით მათი პოზიცია უცვლელი დარჩეს: „გადაჭრით ვერაფერს ვიტყვით, ჯერ არ ვიცით რა იქნება, ამ საკითხს ამუშავებენ“.

„გამორიცხული არაფერია, შესაძლოა ისევ გაზრდილი ხელფასები მოგვაწოდონ დასამტკიცებლად“, – ამბობს საკრებულოს თავმჯდომარის მოადგილე გიორგი გოგიჩაიშვილი და ამატებს, რომ ამ ჯერად მათ მერიას ხელფასების რეგულირებისა და საშტატო ნუსხის დამტკიცების შესახებ საკითხების წარდგენა ცალ–ცალკე სთხოვეს: „მათ წინა სხდომაზე საშტატოც და ხელფასებიც ერთად წარმოგვიდგინეს. იფიქრეს, თუ საშტატოს დავამტკიცებდით ხელფასების რეგულირების საკითხიც გარკვეული იქნებოდა, თუმცა ასე არ არის“.

მომავალი სხდომა ერთ კვირაში, 31 იანვარს 12:00 საათზე გაიმართება. თვითმმართველობაში იმედოვნებენ, რომ ამის შემდეგ 125 თანამშრომელი კუთვნილ ხელფასს მიიღებს.

შეგახსენებთ, რომ 22 იანვარს ბორჯომის მუნიციპალიტეტის მერიაში ხეფლასების დარიცხვა ვერ შეძლეს, მიზეზი ის იყო რომ საკრებულოს ხელფასების რეგულირების საკითხი, ასევე საშტატო ნუსხა დამტკიცებული არ ჰქონდა. სირთულე კი იმან შექმნა, რომ 18 აინვარს გამართულ საკრებულოს სხდომაზე მერია ხელფასების გაზრდილი ოდენობით დამტიცებას ითხოვდა, ამას კი დეპუტატებმა მხარი არ დაუჭირეს. საკრებულოს ოპოზიციონერი დეპუტატები აცადებენ, რომ ხელფასების მატებას ხელს არც ამჯერად აუწევენ.

[თამუნა უჩიძე, ახალციხე]