ბორჯომში მეშვიდედ იმსჯელებენ მერიის თანამშრომლების ხელფასების საკითხზე

რიგგარეშე სხდომა 12:00 საათზე დაიწყება და მხოლოდ ერთ, ხელფასების ზრდის საკითხს დაეთმობა. სხდომის დანიშვნის შესახებ გადაწყვეტილება საკრებულოს თავმჯდომარემ ზაზა ჩაჩანიძემ, გუშინ, 13 მარტს, მიიღო.

მომავალ სხდომას „ქართული ოცნების“ დეპუტატებიც დაესწრებიან.

„ყველა შევალთ სხდომაზე და იმედი გვაქვს, რომ ხელფასები დამტკიცდება. ალბათ ოპოზიციური პარტიების დეპუტატების ნაწილი მხარს დაგვიჭერს“, – ამბობს ფრაქცია „ქართული ოცნების“ დეპუტატი ირაკლი კვირკველია.

შეგახსნებთ, რომ ბორჯომის მუნიციპალიტეტის საკრებულო ხელფასების მატების საკითხს მეშვიდედ განიხილავს. ბოლოს საკრებულოს აღნიშნულ თემაზე 9 მარტს უნდა ემსჯელა, თუმცა, საკრებულომ ხელფასების განმსაზღვრელი დოკუმენტი სხდომაზე განხილვის გარეშე მერიას უკან დაუბრუნა. ამის გამო 9 მარტს დანიშნული სხდომა აღარ ჩატარდა. 28 თებერვალს კი სხდომას დეპუტატებს შორის სიტყვიერი და ფიზიკური დაპირისპირება, შენობაში რამდენიმესაათიანი აურზაური, მეორე დღეს კი მერიის თანამშრომლების საპროტესტო აქცია მოჰყვა.

[თამუნა უჩიძე, ბორჯომი]