ბრალდებული: 'ჩვენება ზეწოლით მიმაცემინეს'

ბორჯომის პოლიციის ყოფილი უფროსის მამუკა ხვედელიანის მორიგი სასამართლო პროცესი, დღეს ერთ-ერთი ბრალდებულის გიორგი ლომიძის დაკითხვით დაიწყო.

გიორგი ლომიძე შსს ორგანოებში 2004 წლიდან მუშაობდა. მისი თქმით, გასული წლის 1 ოქტომბრის შემდეგ ბორჯომის სამმართველოში წამყვან თანამდებობებზე კადრები შეიცვალა და ახალმოსულები ყოფილი თანამშრომლების მიმართ განსაკუთრებული აგრესიით გამოირჩეოდნენ: 'თათბირზე სამცხე-ჯავახეთის სამხარეო მთავარი სამმართველოს უფროსმა ტალახაძემ და მისმა მოადგილემ ხორბალაძემ მკითხეს, შენ ის არ ხარ ყოფილ ხელისუფლებას რომ მისტირიო?!'

ლომიძე სამცხე-ჯავახეთის საოლქო პროკურატურაში ახალდაბის საქმესთან დაკავშირებით დაკითხეს: 'მითხრეს, ჩვენ შენი დაჭერა არ გვინდა, 'სპიკე' [მამუკა ხვედელიანის მეტსახელი] გვაინტერესებსო. მთხოვდნენ მეთქვა, რომ რესტორან 'გურჯებიდან' წამოყვანილი ადამიანები უმიზეზოდ ხვედელიანმა დაგვაკავებინა, მაგრამ ასე არ მითქვამს, რეალური ჩვენება მივეცი'.

ამის შემდეგ, ლომიძეს ხელბორკილები დაადეს და დროებითი მოთავსების იზოლატორში გადაიყვანეს: 'მოვიდა იქ გამომძიებელი ვანო კაჭკაჭიშივილი და მითხრა, შენ მაინც ციხეში გაგიშვებთ, ამიტომ, სჯობს ისეთი ჩვენება მოგვცე, როგორიც ჩვენ გვინდაო. ამის შემდეგ მივეცი სხვა ჩვენება და გირაოთი გამათავისუფლეს'.

ლომიძემ პროცესზე განაცხადა, რომ იგი ადასტურებს პირველ ჩვენებას, მეორეს კი უარყოფს. ასევე განმარტა, რომ როცა დანაშაული დაიბრალა, ადვოკატიც თან ახლდა: 'ასე იმიტომ მოვიქეცი, რომ სხვა გზა არ მქონდა, დამაპატიმრებდნენ'.

პროკურორის კითხვაზე - რა ტიპის ზეწოლას ჰქონდა ადგილი, ლომიძემ უპასუხა, რომ მას ფიზიკურად არავინ შეხებია და გამომძიებელი მასზე ზეწოლას ფსიქოლოგიურად ცდილობდა.

'ხვედელიანი რომ დააკავეს, იმ დღეს სამსახურში ვიყავი. ისე გაუხარდათ, რომ ნადიმი გამართეს. მამუკას ოთაში სუფრა გაშალეს, კომპიუტერში მუსიკები ჩართეს და ცეკვავდნენ', - განაცხადა სასამართლო პროცესზე ლომიძემ.

შეგახსენებთ, დღეს, ახალციხის რაიონულ სასმართლოში, მამუკა ხვედელიანის საქმეზე დღეს ბრალდებულები დაკითხეს. გაიმართა. დღეს ბრალდებულები დაკითხეს.

[თამუნა უჩიძე, ახალციხე]