ვეტერანები მერიას თავშესაფარს სთხოვენ

ამის შესახებ, ვეტერანების უფლებადამცველმა კახა მათოშვილმა დღეს, 14 თებერვალს, თბილისის სააპელაციო სასამართლოში გამართულ სხდომაზე განაცხადა. სასამართლოს უნდა ემსჯელა ტოვებდა თუ არა პირველი ინსტანციის მიერ მიღებული გადაწყვეტილებას ძალაში, რომლის მიხედვითაც, ოთხმა ოჯახმა სადავო შენობა უნდა დატოვოს. თუმცა სხდომა შესაძლო მორიგების მიზეზით გადაიდო.

„მოდავე მხარეს, ანუ ახალციხის მერიას თავშესაფარს ვთხოვთ ამ ოთხი ოჯახისთვის. ასე შესაძლოა მოვრიგდეთ და ეს ხალხიც ქუჩაში არ დარჩება. ისინი სოციალურად დაუცვლათა ბაზაში არიან რეგისტრირებული და რეალურად არაფრის საშუალება არ აქვთ“, – გვითხრა მათოშვილმა.

გარდა აღნიშნულსა, მომავალ სხდომაზე ახალციხის მუნიციპალიტეტის მერიამ იმის გამო, რომ თემი და ქალაქი გაერთიანდნენ, მისი უფლებამოსილების დამადასტურებელი დოკუმენტები უნდა წარადგინოს.

ახალციხის მერიაში აცხადებენ, რომ „ვეტერანებისთვის თავშესაფრის გამოყოფის საკითხზე ფიქრობენ, თუმცა ამ ეტაპზე გადაჭრით არაფრის თქმა არ შეუძლიათ“.

მომავალი სხდომა სააპელაციო სასამართლოში 21 თებერვალს გაიმართება.

შეგახსენებთ, რომ ახალციხეში, პეტრე იბერის ქუჩაზე N17-ში მდებარე შენობა, სადაც წლების წინ სკოლა – ინტერნატი იყო განთავსებული, 2016 წლის 24 სექტემბერს ცხრა ოჯახმა უნებართვოდ დაიკავა. აღნიშნული შენობა ახალციხის მერიის ბალანსზეა, თუმცა ის თვითმმართველობამ 2014 წლის 4 ივნისს უზურფრუქტის წესით (ხელშეკრულება N36) სააგენტოს გადასცა. საკრებულოსა და სააგენტოს შორის გაფორმებული ხელშეკრულების თანახმად, 4 089 კვადრატულ მეტრ მიწაზე განლაგებულ ორ ობიექტში სწავლებისა და გადამზადების ცენტრი უნდა გაიხსნას.

ახალციხის მერიამ ვეტერანების სკოლის შენობიდან გამოსახლება სასამართლოს გზით მოითხოვა. პირველი ინსტანციის სასამართლომ მერიის საჩივარი დააკმაყოფილა. თუმცა, ეს გადაწყვეტილება სააპელაციო სასამართლოში ვეტერანებმა გაასაჩივრეს. ისინი ახალციხის რაიონული სასამართლოს გადაწყვეტილების ბათილად ცნობას ითხოვენ.

[თამუნა უჩიძე, ახალციხე]