ახალციხის მერი: ‘არ გვაქვს ფართი, რომ ვეტერანებს თავშესაფარი გამოვუყოთ’

21 თებერვალს თბილისის სააპელაციო სასამართლოში ახალციხის მერიის წარმომადგენელმა მუნიციპალიტეტის პოზიცია უნდა დააფიქსიროს, შეუძლია თუ არა თვითმმართველობას მოდავე მხარისთვის, ვეტერანების ოთხი ოჯახისთვის თავშესაფრის გამოყოფა.

ახალციხის მუნიციპალიტეტის მერი ზაზა მელიქიძე აცხადებს, რომ თვითმმართველობას ფართი, რომელშიც ვეტერანების ოთხ ოჯახს შეასახლებს, არ აქვს: „ქალაქს არ აქვს ახალგაზრდული ცენტრი, საგამოფენო დარბაზი, ორი ბაღი გვენგრევა ქალაქში და იქ ბავშვების ყოფნა საშიშია. ასეთ ვითარებაში, რეალურად ფართი ნამდვილად არ გვაქვს, რომ ეს ოჯახები დავაკმაყოფილოთ“.

მელიქიძის თქმით, ერთადერთი ფართი, რაც ქალაქში არის, ეს არის წლების წინ მოწყობილი სახლი, რომელიც მიუსაფართთვის მხოლოდ ერთი ღამის გასათევად გაკეთდა: „თუმცა ის მხოლოდ ერთი ღამისთვისაა, იქ ოჯახი ვერ შევა და ვერ იცხოვრებს. რეალურად საკუთრებაში სხვა ფართი არ გვაქვს“.

ახალციხის მერი იმ ოთხი ოჯახის წარმომადგენლებს, რომლებიც თავშესაფარს ითხოვენ, უკვე შეხვდა და ესაუბრა: „ამბობენ, რომ სოფლები მიატოვეს და წამოვიდნენ. ახლა რომ მათ ფართი მივცე, მინიმუმ 1000 კაცი მომადგება მეორე დღეს სოფლებიდან და მუნიციპალიტეტს ბინებს მოსთხოვენ. უამრავი გაჭირვებული ადამიანია მუნიციპალიტეტში, რომელბსაც სახლები თავზე ენგრევათ“.

შეგახსენებთ, რომ 14 თებერვლას თბილისის სააპელაციო სასამართლოში ვეტარანების საქმის განხილვა, იმ მიზეზით გადაიდო, რომ მხარეები (ახალციხის მუნიციპალიტეტის მერია და ვეტერანების ოთხი ოჯახი) შესაძლოა მორიგდნენ.

ასევე, შეგახსენებთ, რომ ახალციხეში, პეტრე იბერის ქუჩაზე N17-ში მდებარე შენობა, სადაც წლების წინ სკოლა – ინტერნატი იყო განთავსებული, 2016 წლის 24 სექტემბერს ცხრა ოჯახმა უნებართვოდ დაიკავა. აღნიშნული შენობა ახალციხის მერიის ბალანსზეა, თუმცა ის თვითმმართველობამ 2014 წლის 4 ივნისს უზურფრუქტის წესით (ხელშეკრულება N36) სააგენტოს გადასცა. საკრებულოსა და სააგენტოს შორის გაფორმებული ხელშეკრულების თანახმად, 4 089 კვადრატულ მეტრ მიწაზე განლაგებულ ორ ობიექტში სწავლებისა და გადამზადების ცენტრი უნდა გაიხსნას.

ახალციხის მერიამ ვეტერანების სკოლის შენობიდან გამოსახლება სასამართლოს გზით მოითხოვა. პირველი ინსტანციის სასამართლომ მერიის საჩივარი დააკმაყოფილა. თუმცა, ეს გადაწყვეტილება სააპელაციო სასამართლოში ვეტერანებმა გაასაჩივრეს. ისინი ახალციხის რაიონული სასამართლოს გადაწყვეტილების ბათილად ცნობას ითხოვენ.

[თამუნა უჩიძე, ახალციხე]