სამცხე–ჯავახეთის უნივერსიტეტის რექტორად მაკა ბერიძე აირჩიეს

მთავარი → სიახლე, საზოგადოება, განათლება 31.01.2018

5 ხმით, 3–ის წინააღმდეგ, სამცხე–ჯავახეთის სახელმწიფო უნივერსიტეტის აკადემიურმა საბჭომ, სასწავლებლის ხელმძღვანელად მაკა ბერიძე აირჩია. არჩევნებში საბჭოს რვავე წევრი მონაწილეობდა, არცერთი ხმა არ გაბათილებულა.

სამცხე–ჯავახეთის უნივერსიტეტის რექტორად მაკა ბერიძე აირჩიეს

რექტორის არჩევნები უნივერსიტეტში დღეს, 31 იანვარს, გაიმართა. არჩევნებში ორი კანდიდატი მონაწილეობდა: მაკა ბერიძე, – რექტორის მოადგილე სამეცნიერო დარგში და ცისკარა ზარანდია, – ბიზნესის ადმინისტრირების ფაკულტეტის დეკანი;

არჩევნებამდე კანდიდატურები მოხსნეს გიორგი მესხმა და რეზო ზედგინიძემ. მესხმა არჩევნებამდე სამი საათით, ზედგინიძემ კი არჩევნებამდე ორი საათით ადრე.

გაცილებით უფრო ადრე გამოეთიშნენ არჩევნებს სასწავლებლის ყოფილი რექტორები: მერაბ ბერიძე და თინა გელაშვილი.

მაკა ბერიძემ თბილისის სახელმწიფო უნივერსიტეტის მესხეთის ფილიალი 1996 წელს დაამთავრა. 1997 წლიდან ამავე სასწავლებელში მუშაობა დაიწყო მოწვეულ მასწავლებელად. იყო ქართული ენის კურსების ტრენერი. 2010 წელს მიენიჭა ფილოლოგიის დოქტორის ხარისხი. 2011 წელს ჰუმანიტარულ და სოციალურ მეცნიერებათა ფაკულტეტზე ხარისხის უზრუნველყოფის სამსახურის სპეციალისტად დაიწყო მუშაობა. 2012 წლიდან უნივერსიტეტში ხარისხის უზრუნველყოფის სამსახურის უფროსის პოზიცია დაიკავა, 2014 წლიდან კი რექტორის მოადგილეა სამეცნიერო დარგში.

[sknews.ge]