მერაბ ბერიძე უნივერსიტეტის რექტორის არჩევნებში მონაწილეობას აღარ მიიღებს

არჩევნებში, რომელიც 31 იანვარს გაიმართება, აკადემიური საბჭო უნივერსიტეტის ახალ რექტორს ხუთ კანდიდატს შორის შეარჩევს.

„უნივერსიტეტის კანცელარიიდან საბუთები უკვე საარჩევნო კომისიას ჰქონდა გადაცემული, როცა მერაბ ბერიძის განცხადება შევიდა იმის შესახებ, რომ კანდიდატურას იხსნიდა“, – ამბობს სამცხე–ჯავახეთის უნივერსიტეტის იურისტი თამარ ჟუჟუნაძე.

მერაბ ბერიძე კანდიდატურის მოხსნის მოტივზე არ საუბრობს: „ასე მირჩევნია ამ ეტაპზე. გადავწყვიტე, რომ ხელი არ შევუშალო სხვებს. როგორც პროფესორი, მუშაობას ჩვეულებრივად გავაგრძელებ“.

უნივერსიტეტში გამართულ რექტორის ბოლო არჩევნებზე, 2017 წლის 3 ივლისს, მერაბ ბერიძემ ორი ხმა მიიღო. მაშინ არჩევნებში ბერიძეს მხოლოდ ერთი კონკურენტი, ასევე ყოფილი რექტორი თინა გელაშვილი ჰყავდა. აკადემიური საბჭოს შვიდი წევრიდან ოთხმა მხარი არცერთ კანდიდატს არ დაუჭირა, ანუ ოთხი ბიულეტინი ბათილად იქნა ცნობილი. დარჩენილი სამი ხმიდან ერთი გელაშვილმა მიიღო, ორი კი მერაბ ბერიძემ.

რექტორის არჩევნები უნივერსიტეტში 31 იანვარს გაიმართება. აკადემიური საბჭო რექტორს ხუთი კანდიდატიდან შეარჩევს. ეს კანდიდატები არიან: მაკა ბერიძე, გიორგი მესხი, ცისკარა ზარანდია, თინა გელაშვილი და რევაზ ზედგინიძე.

[თამუნა უჩიძე, ახალციხე]