ყოფილი რექტორი მერაბ ბერიძე რექტორის მოადგილედ დაინიშნა

სამცხე–ჯავახეთის უნივერსიტეტის რექტორმა მაკა ბერიძემ სამეცნიერო დარგში მოადგილედ უნვიერსიტეტის პროფესორი და ყოფილი რექტორი მერაბ ბერიძე ცხრა თებერვალს დანიშნა. ამის შესახებ მაკა ბერიძემ „სამხრეთის კარიბჭეს“ ყოველკვირეულ გადაცემაში „კვირის აქცენტში“ განაცხადა.

„მერაბ ბერიძე დღეს გახდა რექტორის მოადგილე სამეცნიერო მიმართულებით. აქ არავის დაუსვამს კითხვა რატომ. ვფიქრობ, ეს ლოგიკური გაგრძელება და იმ რესურსის გამოყენებაა, რომელიც აქვს მერაბ ბერიძეს სამეცნიერო კუთხით“, – განაცახდა მაკა ბერიძემ.

შეკითხვაზე, მის მიერ მიღებული გადაწყვეტილება გაამყარებს თუ არა პროფესორებში გაჩნილ ეჭვსა და მოსაზრებებს იმის შესახებ, რომ მაკა ბერიძე მერაბ ბერიძის კადრი იყო, გვპასუხობს: „თუ მე ვერ გადავდგამ ვერცერთ ნაბიჯს, როგორც დამოუკიდებელი მმართველი, თუ არ მექნება კარგად ჩამოყალიბებული პოლიტიკა უნივერსიტეტის განვითარების, თუ აუხლოეს პერიოდში ჩემ მიერ გადადგმული ნაბიჯები არ იქნება მაჩვენებელი იმის, რომ ეს უნივერსიტეტის განვითარებას ემსახურება, მხოლოდ მაშინ შეიძლება დადასტურდეს რაიმე მოსაზრება“.

მაკა ბერიძის თქმით, მოსაზრება იმის შესახებ, რომ ის მერაბ ბერიძის კადრია, შესაძლოა გაჩნდა იმის გამო, რომ არჩევნების შემდეგ მერაბ ბერიძემ საკუთარი მხარდაჭერა მაკა ბერიძის მიმართ ღიად დააფიქსირა: „ამაში უცნაურს ვერაფერს ვხედავ, ბევრად უფრო უცნაური ის იქნებოდა, ეს რომ ასე არ ყოფილიყო. მე სამცხე–ჯავახეთის უნვიერსიტეტი მაქვს დამთავრებული, ჰუმანიტარულ ფაკულტეტზე ვსწავლობდი და ჩვენ ურთიერთობა გვქონდა ჯერ როგორც სტუდენტსა და პროფესორს, შემდეგ კი როგორც კოლეგებს“.

შეგახსენებთ რომ 31 იანვარს მაკა ბერიძე რვაკაციანმა აკადემიურმა საბჭომ, რომლის თავმჯდომარეც რექტორის მოვალეობის შემსრულებელი მერაბ ბერიძე იყო, ხუთი ხმით აირჩია. არჩევნების დასრულების შემდეგ კი შედეგების გამოცხადებისას სხდომა ერთ–ერთმა პროფესორმა თინა გელაშვილმა პროტესტის ნიშნად დატოვა. ის ირწმუნებოდა, რომ მაკა ბერიძე მერაბ ბერიძის კადრი იყო, მერაბ ბერიძემ საბჭოს წევრებზე გავლენა მოახდინა, რის შედეგადაც არჩევნებში გამარჯვებული სწორედ მაკა ბერიძე გახდა.

[თამუნა უჩიძე, ახალციხე]