თინა გელაშვილმა უნივერსიტეტის რექტორის არჩევნებიდან კანდიდატურა მოიხსნა

კანდიდატურის მოხსნის შესახებ სამცხე–ჯავახეთის უნივერსიტეტის პროფესორმა თინა გელაშვილმა საარჩევნო კომისიას განცხადებით გუშინ, 22იანვარს დღის მეორე ნახევარში მიმართა. რექტორობის კიდევ ერთი ყოფილი კანდიდატის მერაბ ბერიძის შემდეგ გელაშვილი მეორე პროფესორია, რომლემაც არჩევნებში მონაწილეობაზე უარი თქვა და კანდიდატურა მოიხსნა.

„სადაც არა სჯობს გაცლა სჯობსო“, ნათქვამია. იქ სადაც პროფესიონალიზმი არაა ჯობია გაეცალო“, – ამბობს თინა გელაშვილი.

შეკითხვაზე, რა გახდა ამ გადაწყვეტილების მიზეზი გელაშვილი გვპასუხობს: „ადამიანები დარწმუნებულები იყვნენ, რომ მე მიჭერდნენ ზემოდან მხარს. არადა არავინ შემიწუხებია, არც არავის შევუწუხებივარ. ბინძური თამაშები დაიწყეს, ამბობდნენ რომ "ნაცი" ვარ და ა.შ. არ იყო გუნდური მუშაობა, დაძაბული იყო ვითარება, ამიტომ ასე ვარჩიე“.

ბოლო რექტორის არჩევნებში, რომელიც უნივერსიტეტში 2017 წლის ივლისში გაიმართა, მონაწილეობას მხოლოდ ორი კანდიდატი, თინა გელაშვილი და მერაბ ბერიძე იღებდა. თუმცა, ბერიძემ ორი გელაშვილმა კი ერთი ხმა მიიღო, შესაბამისად რექტორის პოზიცია ვერცერთმა მათგანმა ვერ დაიკავა. მიუხედავად ამისა, ორივე პროფესორმა გამარჯვებისთვის ბრძოლა 2018 წლის არჩევნებზეც გადაწყვიტა, თუმცა რამდენიმე დღით ადრე ორივე მათგანმა კანდიდატურა მოიხსნა. შეკითხვაზე, ხომარ განხორციელდა რაიმე ტიპის ზეწოლა გელაშვილმა გვიპასუხა, რომ მსგავსი არაფერი ყოფილა.

ისევე როგორც ბერიძე, გელაშვილიც უნივერსიტეტში აკადემიურ პოზიციაზე რჩება: „ევროპის 60 უნივერსიტეტთან მაქვს კონტაქტი და მინდოდა, რომ ეს კავშირები რექტორის პოზიციაზე უნივერსიტეტის სასარგებლოდ გამომეყენებინა, მაგრამ ჩემთვის თანამდებობა მთავარი არაა“.

თინა გელაშვილი აკადემიური საბჭოს წევრია და ამბობს, რომ ერთ–ერთ კანდიდატს მხარს აუცილებლად დაუჭერს: „მოვისმენ მათ პროგრამებს და არჩევანს ამის მიხედვით გავაკეთებ“.

რექტორის არჩევნები უნივერსიტეტში 31 იანვარს გაიმართება. აკადემიური საბჭო რექტორს ოთხი კანდიდატიდან შეარჩევს. ეს კანდიდატები არიან: მაკა ბერიძე, გიორგი მესხი, ცისკარა ზარანდია და რევაზ ზედგინიძე.

[თამუნა უჩიძე, ახალციხე]