აქციის მონაწილეები, რომლებიც ჩამორთმეული მანქანების დაბრუნებას ითხოვენ, პროკურორებს შეხვდნენ

ადიგენის და ბორჯომის მუნიციპალიტეტებში მცხოვრებლებმა რეგიონის გუბერნატორთან შეხვედრის შემდეგ, საპროტესტო აქცია სამცხე–ჯავახეთის საოლქო პროკურატურასთან გამართეს. მათი მოთხოვნა უცვლელია, ადგილობრივები სამართალდამცავებს იმ მანქანების დაბრუნებას სთხოვენ, რომლებიც მათ ხე–ტყის გადატანის დროს ჩამოართვეს.

ისევე როგორც გუბერნიაში, საოლქო პროკურატურაშიც პროკურორებთან სასაუბროდ ხუთი მონაწილე შეიყვანეს.

„გვითხრეს, ვიძიებთ ამ საქმეს და მანქანები დაგიბრუნდებათო. დავინტერესდით კონფისკაცია ხომარ გვემუქრებოდა და გვითხრეს არა, ჩვენ კერძო საკუთრებას ვერ ვეხებითო“, – გვითრეს პროკურატურიდან გამოსულმა აქციის მონაწილეებმა.

მათი თქმით, შეკითხვაზე, თუ რა ვადაში დაუბრუნებენ მოქალაქეებს ჩამორთმეულ მანქანებს, პასუხი ვერ მიიღეს: „გვითხრეს ყოველდღე ვმუშაობთო. ამისთვის ჯერ დრო გვაქვს და კანონიერ ვადაში ვეტევითო“.

მიუხედავად იმისა, რომ აქციის მონაწილეები პროკურატურაში მიღებული პასუხით კმაყოფილები არ იყვნენ, უწყებიდან გამოსვლის შემდეგ დაიშალნენ: „მანქანებს არ გვიბრუნებენ და მივდივართ სახლში“.

აქცია ახალციხეში დღეს, 26 იანვარს დაახლოებით ოთხი საათი გაგრძელდა. მოქალაქეების კატეგორიული მოთხოვნა, რომ გუბერნატორი მათთან შესახვედრად ადმინისტრაციული შენობის წინ გამოსულიყო არ შესრულდა. მხარის რწმუნებულმა აკაკი მაჭუტაძემ კაბინეტში მხოლოდ ხუთი მათგანი მიიღო და ურჩია, რომ ადვოკატისთვის მიემართათ.

შეგახსენებთ, რომ ადიგენისა და ბორჯომის მუნიციპალიტეტების მცხოვრებლებმა, რომლებსაც ბოლო პერიოდში, სხვადასხვა დროს, ხე–ტყის გადატანისას ავტომანქანები ჩამოართვეს, სამცხე–ჯავახეთის სამხარეო ადმინისტრაციასთან აქცია 18 დეკემბერსაც გამართეს.

აქციის მონაწილეების ნაწილი აცხადებს, რომ ხე–ტყე უკანონოდ აქვთ მოპოვებული და მზად არიან ჯარიმაც გადაიხადონ, თუმცა აპროტესტებენ მანქანების ჩამორთმევას აპროტესტებენ. ნაწილი კი ამბობს, რომ მათ მანქანაც და მასალაც უკანონოდ ჩამოართვეს.

[sknews.ge]