აქციის მონაწილეები: „გუბერნატორი ჩამორთმეული მანქანების დაბრუნებაში დაგვეხმაროს“

ბორჯომსა და ადიგენში მცხოვრები 50–მდე ადგილობრივი, დღეს, 26 იანვარს დილიდან სამცხე–ჯავახეთის სამხარეო ადმინისტრაციასთან შეიკრიბა. ადგილობრივები რეგიონის გუბერნატორს აკაკი მაჭუტაძეს სთხოვენ, რომ ის მათ ხე–ტყის გადატანის დროს ჩამორთმეული მანქანების დაბრუნებაში დაეხმაროს.

„გუბერნატორი დაგვპირდა, რომ გაარკვევდა ჩვენ ამბავს ოლქის პროკურორთან, მაგრამ არაფერი გაუკეთებია. გვინდა, რომ მაჭუტაძე ჩამორთმეული მანქანების დაბრუნებაში დაგვეხმაროს“, – აცხადებენ ადგილობრივები.

ადგიენსა და ბორჯომში მცხოვრებლები აქციას სამხარეო ადმინისტრაციის შენობასთან უკვე მეორედ მართავენ. პირველად აქ 18 დეკემბერს შეიკრიბნენ. მათი მოთხოვნა უცვლელია, უკანონოდ მოპოვებული ხე–ტყე ჩამოართვან, დააჯარიმონ და კუთვნილი მანქანები დაუბრუნონ.

[sknews.ge]