დღეს, 18 დეკემბერს, ბორჯომისა და ადიგენის მუნიციპალიტეტების მცხოვრებლებმა, რომლებსაც ბოლო სამი თვის განმავლობაში, სხვადასხვა დროს, ხე–ტყის გადატანისას ავტომანქანები ჩამოართვეს, სამცხე–ჯავახეთის სამხარეო ადმინისტრაციის შენობასთან საპროტესტო აქცია გამართეს. ადგილობრივები საქმის დროულად გამოძიებას და კუთვნილი მანქანების უკან დაბრუნებას ითხოვდნენ.
„გუბერნატორთან იმიტომ მოვედით რომ ხელისუფალი ესაა, არსად პასუხს არ გვცემენ, ვიღაცამ ხომ უნდა მოგვისმინოს“, – ასე ახსნეს აქციის გუბერნიასთან გამართვის მოტივი შეკრებილებმა, რომელთა შორის, უმეტესობა ბორჯომიდან იყო, მათ შორის ისეთებიც, რომლებსაც, სხვადასხა დროს, ორი მანქანა ჩამოართვეს.
„გუშინ „მერსედესი“, თვენახევრის წინ კი „მარშუტკა“ ჩამომართვეს. ორივეჯერ ჭობისხევიდან ცხრამუხაში მიმქონდა მასალა. სახლი ვიყიდე და ისეა დანგრეული „პოლი“, ბავშვები ვარდებიან“, – ამბობს ბორჯომის მკვიდრი ივანე შაყულაშვილი და ამატებს, – „პირველად რომ ჩამომართვეს, ავდექი და მეორედ წავიღე, მაგრამ ისევ არ გამიმართლა. მასალა უსაბუთო იყო“.
შეკითხვაზე – მანქანის ერთხელ ჩამორთმევის შემდეგ იგივე რატომ გაიმეორა და თანაც, უსაბუთოდ, ამბობს: „მასალის საბუთს რთულად იძლევიან და თუ მოგცეს, ისეთ ადგილზე დაგინომრავენ ხეს, სამი კუბური მეტრის სახლამდე მიტანა 500 ლარზე მეტი დაგიჯდება“.
დღეს ბორჯომიდან ახალციხეში ჩამოსულების უმრავლესობა აცხადებდა, რომ მასალა უკანონოდ გადაჰქონდა.
„დავაშავე, მოვიპარე, მოვჭერი, მაგრამ მანქანა ნათხოვარი მყავდა და დამიბრუნონ. თუ რეაგირება არ იყო, აქ მოვალთ ხვალც, ზეგაც და სულ აქ ვიქნებით“, – ამბობს ალექსანდრე ფერაძე, რომელსაც ხუთი კუბური მეტრით დატვირთული „ფორდ ტრანზიტი“ ჩამოართვეს.
სამი თვის წინ, უსაბუთო, კუბამეტრნახევარი მასალა გადაჰქონდა ბორჯომიდან თბილისში რამაზ ფერაძეს: „დამიწერონ ჯარიმა რაც მეკუთვნის და მანქანა დამიბრუნონ, იმით ვარჩენ ოჯახს. გაფუჭდა მანქანები, ღია ცის ქვეშ ყრია, წყალი ჩადის, დაუსკდათ „მატორები“.
აქციის მონაწილეებს შორის იყვნენ ისეთებიც, რომლებიც ირწმუნებოდნენ, რომ მასალის წარმოშობის დამადასტურებელი ყველა დოკუმენტი ჰქონდათ.
„საფინანსოსგან ვიყიდე აუქციონზე გამოტანილი ორ კუბამეტრამდე მრგვალი მორი და ადიგენში დავხერხე. ერთ ღერსაც თუ ვინმე ნახავს იმ მანქანაში უკანონოს, დამაჯარიმონ“, – ამბობს ადიგენში, სოფელ ზარზმაში მცხოვრები ზაურ საგინაძე და ამატებს, რომ ყველა საგამოძიებო უწყებას მიმართა გამოძიების დაჩქარების თხოვნით თუმცა, უშედეგოდ, – „ვიხვეწები, რომ დამკითხონ, კანონიერად გამოარკვიონ რა მოხდა, მაგრამ ყურადღებას არავინ მაქცევს“.
ლევან ართმელაძეც ამბობს, რომ როცა ზარზმიდან ვალეში შეშა გადაჰქონდა, დოკუმენტები წესრიგში ჰქონდა: „მანქანა გაგვიფუჭდა გზაში და დანიშნულების ადგილამდე დროულად ვერ მივიტანეთ, ამის გამო „მარშუტკაც“ ჩამოგვართვეს და შეშაც“.
ხე–ტყის უკანონოდ ჭრასა და გადაზიდვაზე კონტროლს სამი უწყება: შინაგან საქმეთა სამინისტრო, ფინანსთა სამინისტროს საგამოძიებო სამსახური და გარემოსდაცვითი ზედამხედველობის დეპარტამენტი ახორციელებს.
გარემოსდაცვითი ზედამხედველობის დეპარტამენტში ამბობენ, რომ სამცხე–ჯავახეთში ამჟამად მათ მიერ ჩამორთმეული არცერთი მანქანა არ არსებობს: „ბოლო სამი თვის განმავლობაში, ჩვენს მიერ გამოვლენილ ყველა ფაქტზე სასამართლო პროცესი უკვე გაიმართა და საქმე დასრულდა“.
საგამოძიებო უწყებებში აცხადებენ, რომ დოკუმენტები რომლითაც ხე–ტყე გადააქვთ, ხშირ შემთხვევაში ყალბია, ძიების პროცესი კი დროში არ ჭიანურდება.
„გამოძიებას თავისი პროცედურები აქვს. როგორც კი გამოძიება დასრულდება, ავტომანქანები დაუბრუნდებათ“, – გვითხრეს შინაგან საქმეთა სამინისტროს საზოგადოებასთან ურთიერთობის სამსახურში.
ფინანსთა სამინისტროს საგამოძიებო სამსახურში კი აცხადებენ, რომ დეტალურ ინფორმაციას ამ საქმეებთან დაკავშირებით, ხვალ 19 დეკემბერს მოგვაწვდიან: „ახლაის შეგვიძლია გითხრათ, რომ ყველა მანქანა კანონის საფუძველზეა ამოღებული“.
„კი ბატონო, კანონიერად ამოიღეს მანქანა, მაგრამ დაგვიბრუნონ, ადმინისტრაციულ ჯარიმას ვექვემდებარები, დამაჯარიმონ და საქმე დაასრულონ“, – ამბობს პაატა ბლიაძე, რომელსაც „მარშუტკა“, ექვს კუბამეტრამდე უსაბუთო ფიცართან ერთად, ორი თვის წინ ჩამოართვეს.
სამცხე–ჯავახეთის გუბერნატორს, აკაკი მაჭუტაძეს დღეს აქციის სამი მონაწილე შეხვდა. მათ რეგიონის პირველ პირს, საქმის დროულად გამოძიების მიზნით, შესაბამის უწყებებთან კომუნიკაცია სთხოვეს.
„გულისყურით მოგვისმინა და დახმარებას დაგვპირდა. ჩვენი ნომრები მოინიშნა, გვითხრა რეგიონის პროკურორს შევხვდები, გავერკვევი რა ხდება და დაგირეკავთო“, – ამბობს ვასილ აიწურაძე.
გუბერნატორთან შეხვედრის შემდეგ აქციის მონაწილეები დაიშალნენ. პროკურატურაში კი „სამხრეთის კარიბჭეს“ განუცხადეს, რომ პროკურატურა ხე–ტყის უკანონოდ გაჩეხვაში ბრალდებული პირებისა და ზოგადად აღნიშნული დანაშაულის მიმართ, უმკაცრეს სისხლის სამართლის პოლიტიკას ატარებს: „შესაბამისად, პროკურატურის გადაწყვეტილებაა, რომ დამატებითი სასჯელის სახით, ხე–ტყის უკანონოდ ჭრის დროს გამოყენებული სხვადასხვა სახის სატრანსპორტო საშუალება, როგორც დანაშაულის ჩასადენად გამიზნული ნივთი, დაექვემდებაროს ჩამორთმევას“.
ამ დროისათვის, ჩამორთმეული მანქანების ნაწილი, ახალციხეში, ფინანსთა სამინისტროს მომსახურების სააგენტოს ეზოში, ნაწილი კი ე.წ. თბილი წყლების მიმდებარედაა გაჩერებული. სულ რამდენი მანქანაა ჩამორთმეული, ვერ დავაზუსტეთ. ადგილობრივები ამბობენ, რომ მათი რიცხვი 250–მდეა, შსს–ს ინფორმაციის გამოთხოვას წერილობით ითხოვს, ფინანსთა სამინისტრო კი კითხვაზე პასუხს ხვალ გაგვცემს.
აქციის მონაწილეები პასუხს, – რა ბედი ეწევა მათ ავტომანქანებს, გუბენრატორისგან ორ დღეში ელიან.
[თამუნა უჩიძე, ახალციხე]