აქციის მონაწილეები: „გუბერნატრომა ადვოკატის აყვანა გვირჩია“

აქციის მონაწილეებს და მხარის რწმუნებულს შორის საუბარი დაახლოებით ნახევარ საათს გაგრძელდა.

„გვითხრა, ადვოკატი აიყვანეთ და საგამოძიებო ორგანოებიდან ის უკეთ გამოგიტანთ პასუხსო“, – ამბობს აქციის ერთ–ერთი მონაწილე, ბორჯომის მკვიდრი ანზორ დარბაიძე.

ადგილობრივები ფიქრობენ, რომ უახლოეს დღეებში ადვოკატთან კონსულტაციით ისარგებლებენ.

„მშვიდობიანად მოვედით და ვითხოვთ პასუხის გაცემას. გუბერნიაში შეგვპირდნენ ორი თვის წინ დახმარებას, გვითხრეს ორ დღეში დაგირეკავთ და გეტყვით პასუხსო, მაგრამ არავინ დაგვკავშირებია. მოგვაქციონ ყურადღებას. გვითხრან რაშია საქმე, რა ბედი გვეწევა. თავებს არ ვიმართლებთ, თუ მასალა არის უკანონო, ჩამოგვართვან და მანქანები დაგვიბრუნონ“, – ამბობს აქციის მონაწილე ივანე შაყულაშვილი.

გუბერნატორთან შეხვედრის შემდეგ აქციის მონაწილეებმა სამცხე–ჯავახეთის საოლქო პროკურატურასთან გადაინაცვლეს.

შეგახსენებთ, რომ დღეს 26 იანვარს დილიდან ბორჯომსა და ადიგენში მცხოვრები 50–მდე მოქალაქე სამხარეო ადმინისტრაციასთან საპროტესტო აქციას მართავს. მათი მოთხოვნა ხე–ტყის გადატანის დროს ჩამორთმეული მანქანების დაბრუნებაა. ამ პროცესში ჩართვასა და დახმარებას კი გუბერნატორს სთხოვენ.

აქციის მონაწილეები აცხადებენ, რომ თვეების წინ მანქანები ჩამოართვეს, საქმეების გამოძიებას კი აჭიანურებენ. ამიტომ მათი მოთხოვნა საქმეების დროულად გამოძიება და ჩამორთმეული მანქანების დაბრუნებაა.

[sknews.ge]