მოქალაქეებს, რომლებსაც, ხე–ტყის გადატანის დროს მანქანები ჩამოართვეს, გუბერნატორი შეხვდა

სამცხე–ჯავახეთის სამხარეო ადმინისტრაციასთან მიმდინარე აქციის მონაწილეები, შეკრებიდან რამდენიმე საათში, იმ იმედით დაიშალნენ, რომ საგამოძიებო უწყებები მათი საქმის შესწავლას დააჩქარებენ. შეგახსენებთ, ახალციხეში დღეს ადიგენისა და ბორჯომის მუნიციპალიტეტების ის მცხოვრებლები იყვნენ შეკრებილი, რომლებსაც ბოლო პერიოდში, სხვადასხვა დროს, ხე–ტყის გადატანისას ავტომანქანები ჩამოართვეს. ისინი ითხოვენ, თუ ჯარიმა ეკუთვნით, დააჯარიმონ და ჩამორთმეული მანქანები დროულად დაუბრუნონ.

აქციის სამი მონაწილე, სამცხე–ჯავახეთის გუბერნატორს, აკაკი მაჭუტაძეს შეხვდა. მათ რეგიონის პირველ პირს საქმის დროულად გამოძიების მიზნით შესაბამის უწყებებთან კომუნიკაცია სთხოვეს.

„ვთხოვეთ, რომ დაგვიდგეს გვერდში და საგამოძიებო უწყებებს სთხოვოს საქმე სწრაფად გამოიძიონ. გულისყურით მოგვისმინა და დახმარებას დაგვპირდა“, – ამბობს ბორჯომის მკვიდრი ვასილ აიწურაძე.

მისი თქმით, უახლოეს დღეებში მათ გუბერნატორი თავად დაუკავშირდება: „ჩვენი ნომრები მოინიშნა, გვითხრა პროკურორს შევხვდები, გავერკვევი რა ხდება და დაგირეკავთო“.

გუბერნატორთან შეხვედრის შემდეგ სამხარეო ადმინისტრაციასთან შეკრებილები დაიშალნენ. მათი ნაწილი იმედოვნებს, რომ „საქმე დაიძრა და ახლა სწრაფად გამოიძიებენ“, ნაწილი კი პერმანენტულად აქციების გაგრძელებას აანონსებს.

სამცხე–ჯავახეთის სამხარეო ადმინისტრაციაში "სამხრეთის კარიბჭეს" განცხადეს, რომ მოქალაქეებს საქმის შესწალას ნამდვილად დაჰპირდნენ, თუმცა ამას გარკვეული დრო სჭირდება: "აღნიშნული პრობლემის მოგვარება, კანონმდებლობის შესაბამისად, გარკვეული პროცესუალური ნორმების დაცვას მოითხოვს, თუმცა იმედი გვაქვს, იგი უმოკლეს დროში გადაწყდება".

შეგახსენებთ, რომ ადიგენისა და ბორჯომის მუნიციპალიტეტების მცხოვრებლები, რომლებსაც ბოლო პერიოდში, სხვადასხვა დროს, ხე–ტყის გადატანისას ავტომანქანები ჩამოართვეს, სამცხე–ჯავახეთის სამხარეო ადმინისტრაციის შენობასთან დღეს საპროტესტო აქციას მართავდნენ.

[თამუნა უჩიძე, ახალცხე]