ხე–ტყის გადატანისას მანქანა ჩამორთმეული მოქალაქეები აქციებს აანონსებენ

დღეს, 20 დეკემბერს, ბორჯომსა და ადიგენში მცხოვრებლები, რომლებმაც ორი დღის წინ სამცხე–ჯავახეთის სამხარეო ადმინისტრაციასთან აქცია გამართეს, გუბერნატორისგან აკაკი მაჭუტაძისგან დაკავშირებას ელოდნენ.

აქციის მონაწილეებს ბოლო სამი თვის განმავლობაში, სხვადასხვა დროს, ხე–ტყის უკანონოდ გადატანისას ავტომანქანები ჩამოართვეს, ისინი თავინთი საქმეების დროულად გამოძიებას და მანქანების დაბრუნებას ითხოვდნენ. ამ საკითხთან დაკავშირებით კი გუბერნატორს საგამოძიებო უწყებებთან კომუნიკაციას სთხოვდნენ.

მაჭუტაძე ადგილობრივებს დაჰპირდა, რომ სამცხე–ჯავახეთის საოლქო პროკურორს შეხვდებოდა და ორ დღეში აქციის მონაწილეებს პასუხს აცნობებდა, თუმცა, ამ დრომდე გუბერნიიდან მათ არავინ დაკავშირებია.

შეხვდა თუ არა გუბენრატორი საოლქო პროკურორს ამის შესახებ გუბერნიაში კომენტარს არც „სამხრეთის კარიბჭესთან“ აკეთებენ. ამბობენ, რომ აქციის მონაწილეებს აუცილებად დაურეკავენ და პასუხსაც აცნობებენ. ადგილობრივები კი აცხადებენ, რომ თუ პასუხი ვერ მიიღეს, კვლავ აქციას გამართავენ.

შეგახსენებთ, რომ ადიგენისა და ბორჯომის მუნიციპალიტეტების მცხოვრებლებმა, რომლებსაც ბოლო პერიოდში, სხვადასხვა დროს, ხე–ტყის გადატანისას ავტომანქანები ჩამოართვეს, სამცხე–ჯავახეთის სამხარეო ადმინისტრაციასთან 18 დეკემბერს აქცია გამართეს.

[თამუნა უჩიძე, ახალცხე]