ახალციხეში შშმ პირებისთვის ადაპტირებული გარემოს შექმნაზე იმსჯელეს

შეხვედრა შშმ პირების უფლებათა დამცველი ორგანიზაციების, „მოძრაობა ხელმისაწვდომი გარემო ყველასთვის“ და „ყველა ყველასათვის“, ინიციატივით გაიმართა. შეხვედრას ახალციხის მერი გიორგი კოპაძე და მერიის წარმომადგენლები ესწრებოდნენ.

„ჩვენ გვქონდა საუბარი იმ სამოქმედო გეგმით გაწერილ ვალდებულებაზე, რომელიც სამინისტროებთან ერთად ადგილობრივ მუნიციპალიტეტებსაც აკისრიათ. შევახსენეთ სამოქმედო გეგმის იმ კომპონენტების შესახებ, სადაც მათ კონკრეტული აქტივობები უნდა განახორციელონ“, – ამბობს არასამთავრობო ორგანიზაცია „მოძრაობა ხელმისაწვდომი გარემო ყველასთვის“ წარმომადგენელი გიორგი ახმეტელი.

უფლებადამცველებმა მერიის წარმომადგენლებთან შშმ პირთა ინკლუზიური განათლების ხელშეწყობაზე, დასაქმებასა და მათთვის ადაპტირებული გარემოს შექმნაზეც ისაუბრეს.

„არის მზაობა მერიისგან 2015 წლის ბიუჯეტში თანხა გამოყონ ამ მიმართულებით. მთავარია ნათქვამი საქმედ იქცეს“, – ამბობს გიორგი ახმეტელი.

ახალციხის მერიაში განმარტავენ, რომ შშმ პირთა რეკომენდაციებს გაითვალისწინებენ და ადაპტირებული გარემოს შექმნაზე იზრუნებენ.

„ინფრასტრუქტურულ პროექტებში, რომელსაც ჩვენ ვახორციელებთ გათვალისწინებული იქნება მათთვის ადაპტირებული გარემო. შესაძლებელია შევიძინოთ მოძრავი ტექნიკური მოწყობილობა, რომელიც შშმ პირებს კიბეებზე გადაადგილებაში დაეხმარება“, – ამბობს ახალციხის მერის მოადგლე ზაზა თამარაშვილი.

[თინათინ ზაზაძე, ახალციხე]