საკრებულოს თავმჯდომარე, ზაზა ჩაჩანიძე "პატრიოტთა ალიანსიდან", რომელიც პირველ სხდომაზე ხმაურისა და "ოცნების" პროტესტის ფონზე აირჩიეს, ამბობს, რომ ბორჯომის საკრებულოში სხდომები ყოველი მეოთხე კვირის ოთხშაბათს გაიმართება: "დღეს მოუწია ეს დღე და ჩავნიშნეთ სხდომა. გვაქვს მხოლოდ ერთი საკითხი – ბიუჯეტის განხილვა".
მისივე თქმით, საკრებულო აპირებს ითანამშრომლოს ბორჯომის მერთან, ლევან ლიპარტიასთან, რომელიც მმართველი გუნდის, "ქართული ოცნების" წარმომადგენელია: "ორშაბათს შევა ახალი მერი კაბინეტში და მასთან ვითანამშრომლებთ. კარგი პროექტები რაც ექნებათ, ერთად განვახორციელებთ. ერთადერთი რაშიც არ დავეთანხმებით "ოცნებას", პრემია–დანამატების საკითხია. სხვა ყველაფერში ვითანამშრომლებთ".
სხდომის დაწყების წინ, დეპუტატმა "ერთიანი ნაციონალური მოძრაობიდან", ბაკურ გელაშვილმა, განაცხადა, რომ საოლქო საარჩევნო კომისიის მიერ გადმოცემული დოკუმენტები, – შემაჯამებელი ოქმები და დეპუტატების სააღრიცხვო ბარათები, გასაცნობად, 10 წუთით, სამანდატო კომისიის თავმჯდომარემ "ქართული ოცნების" წარმომადგენელმა, გიორგი ფერაძემ ითხოვა, თუმცა, უკან აღარ დააბრუნა: "ახლა ეს დოკუმენტები არის გუბერნატორთან, აკაკი მაჭუტაძესთან, რაც დაუშვებელია, რადგან შეიცავს პერსონალურ ინფორმაციას".
როგორც გელაშვილმა დააზუსტა, საუბარია საკრებულოს პირველ სხდომაზე წაღებულ დოკუმენტებზე. ბაკურ გელაშვილი სამანდატო კომისიის თავმჯდომარეა, აქედან გამომდინარე საოლქო კომისიის მიერ გადაცემული დოკუმენტები მას ჰქონდა. გიორგი ფერაძემ კი, როგორც მდივანმა, გაცნობის მიზნით სთხოვა რამდენიმე წუთით. გელაშვილი ამბობს, რომ გადასცა ეს დოკუმენტები და თან გაჰყვა რადგან პასუხისმგებლობა აღნიშნულ დოკუმენტებზე მასაც ეკისრებოდა: "გიორგი ფერაძე შევიდა იმ ოთახში, სადაც ამ დროს, ანუ პირველი სხდომის მიმდინარეობისას, გუბერნატორი იჯდა. ჩემს თვალწინ მისცა ეს საბუთები გუბერნატორს და უკან აღარ დაუბრუნებია".
ზაზა ჩაჩანიძე და ბაკურ გელაშვილი ამბობენ, რომ სავრაუდოდ ფერაძეს ეგონა, რომ აქ ის დოკუმენტი იქნებოდა, რომელიც ყველაზე მნიშვნელოვანია, ანუ საკრებულოს უფლებამოსილების ცნობის ოქმი, რომელსაც ხელს ფერაძეც აწერს. თუმცა ეს დოკუმენტი იქ არ იდო. ჩაჩანიძე ამბობს, რომ იმ დოკუმენტების საკრებულოში ყოფნა–არ ყოფნის საკითხი არაფერს ცვლის.
გელაშვილი ამ დოკუმენტების უკან გადაცემას ითხოვს და ასევე, მიმართავს საქართველოს სახალხო დამცველს, დაინტერესდეს ბორჯომში მიმდინარე მოვლენებით.
ბაკურ გელაშვილის ნათქვამს კატეგორიულად უარყოფს გიორგი ფერაძე: "არავითარი დოკუმენტები არ გადმომცემია. არც გუბერნატორისთვის მიმიცია არაფერი, რა სისულელეა".
ბაკურ გელაშვილის მოწოდებულ ინფორმაციას მტკნარ სიცრუეს უწოდებენ სამხე–ჯავახეთის სამხარეო ადმინისტრაციაში.
"გვინდა აღვნიშნოთ, რომ სახელმწიფო რწმუნებულის-გუბერნატორის ადმინისტრაციის კომპეტენციებში არ შედის საკრებულოს ფორმირების პროცესებში ჩართვა. შესაბამისად, არც გუბერნატორი ყოფილა ამ პროცესში ჩართული და არც დოკუმენტაციის გატანას ჰქონია ადგილი", – ამბობენ უწყებაში.
[sknews.ge]