ბორჯომის საკრებულოს სხდომა სიტყვიერი დაპირისპირების ფონზე გრძელდება [Video]

ბორჯომის საკრებულოს სხდომათა დარბაზში „ქართული ოცნების“ დეპუტატები დაბრუნდნენ. სხდომაზე დაბრუნება შეძლეს იმ დეპუტატებმაც, რომლებიც თავს შეუძლოდ გრძნობდნენ და სასწრაფო სამედიცინო დახმარების გამოძახება დასჭირდათ.

ამის შემდეგ დეპუტატებმა მოქალაქეებსა და მხარდამჭერებს, რომლებიც სხდომას ესწრებოდნენ დარბაზის დატოვება სთხოვეს იმ მიზნით, რომ პროცესი მშვიდ გარემო წარიმართოს და დღის წესრიგით გათვალისწინებული საკითხების ამოწურვა მოხდეს.

თუმცა, სიმშვიდის შენარჩუნება დარბაზში მაინც ვერ მოხერხდა. ამჯერად „ოცნებისა“ და ოპოზიციური პარტიების დეპუტატებმა დავა იმაზე დაიწყეს, უნდა იქნეს თუ არა ცნობილი ლეგიტიმურად ის საკითხები, რომლებიც საკრებულომ მას შემდეგ გადაწყვიტა, რაც დარბაზიდან „ოცნების“ დეპუტატები გავიდნენ.

ოპოზიციონერმა დეპუტატებმა მმართველი გუნდის წარმომადგენლების გარეშე სამანდატი კომისია, ასევე ხმის დამთვლელი კომისია აირჩიეს.

„ქართული ოცნება“ მათ გაუქმებას და ხელახლა არჩევას ითხოვს. ოპოზიცია კი მათ ძალაში დატოვებას. სხდომა ხმაურის ფონზე მიმდინარეობს.



შეგახსენებთ, რომ დღეს, 20 ნოემბერს ბორჯომში საკრებულოს პირველი სხდომა ხმაურის ფონზე მიმდინარეობს. ოპოზიცია დღის წესრიგში ერთი საკითხის დამატებას, კომისიების თავმდჯომარეების არჩევას ითხოვდა. დეპუტატები ამაზე შეთანხმდნენ, თუმცა ამის შემდეგ დავის მიზეზი სამანდატო კომისიის არჩევის წესი გახდა. რის შედეგადაც "ოცნებამ" სხდომა დატოვა.

სხდომაზე დაძაბული ვითარების გამო საკრებულოს დეპუტატები შეუძლოდ გახდნენ. ამიტომ მერიაში სასწრაფო გამოიძახეს, ერთ–ერთი მათგანი კი საავადმყოფოში გადაიყვანეს.

ასევე შეგახსენებთ, რომ სამცხე–ჯავახეთში ყველაზე მრავალპარტიული საკრებულო ბორჯომს ჰყავს. საკრებულოში ოთხი ოპოზიციური პარტიის წარმომადგენელი შევიდა. ბორჯომი რეგიონში ის გამონაკლისია, სადაც „ოცნებას“ უმრავლესობა არ აქვს, – საკრებულოში 13 დეპუტატი მმართველი გუნდიდან, 15 კი ოპოზიციიდანაა.

[sknews.ge]