ლევან დევიძე: „ბორჯომის საკრებულომ საკუთარი უფლებამოსილება ვერ ცნო“

N36 ბორჯომის საოლქო საარჩევნო კომისიის თავმჯდომარემ ლევან დევიძემ ბორჯომის საკრებულო დატოვა. მისი თქმით, პირველი სხდომა ხელახლა უნდა დაინიშნოს, რადგან დღეს ახლადარჩეული საკრებულოს მიერ უფლებამოსილების ცნობა ვერ მოხერხდა.

„კანონის მიხედვით მომავალი სხდომა 10 დღის ვადაში დაინიშნება. ეს იქნება მეორე სხდომა, თუმცა, სამართლებრივად პირველი. დღეს სამწუხაროდ ელემენტარული პროცედურები ვერ შედგა. იმედი მაქვს, რომ მომავალი სხდომა კანონის ფარგლებში და სამართლებრივ სივრცეში წარიმართება“, – განაცხადა დევიძემ და დაამატა, რომ მან სამანდატო კომისიას ყველა დოკუმენტი, რასაც კანონი ითვალისწინებდა უკვე გადასცა.

მიუხედავად მისი განცხდებისა ოპოზიცია სხდომას აგრძელებს.

შეგახსენებთ, რომ დღეს, 20 ნოემბერს ბორჯომში საკრებულოს პირველი სხდომა ხმაურის ფონზე მიმდინარეობს. ოპოზიცია დღის წესრიგში ერთი საკითხის დამატებას, კომისიების თავმდჯომარეების არჩევას ითხოვდა. დეპუტატები ამაზე შეთანხმდნენ, თუმცა ამის შემდეგ დავის მიზეზი სამანდატო კომისიის არჩევის წესი გახდა. რის შედეგადაც "ოცნებამ" სხდომა დატოვა.

სხდომაზე დაძაბული ვითარების გამო საკრებულოს დეპუტატები შეუძლოდ გახდნენ. ამიტომ მერიაში სასწრაფო გამოიძახეს, ერთ–ერთი მათგანი კი საავადმყოფოში გადაიყვანეს.

ასევე შეგახსენებთ, რომ სამცხე–ჯავახეთში ყველაზე მრავალპარტიული საკრებულო ბორჯომს ჰყავს. საკრებულოში ოთხი ოპოზიციური პარტიის წარმომადგენელი შევიდა. ბორჯომი რეგიონში ის გამონაკლისია, სადაც „ოცნებას“ უმრავლესობა არ აქვს, – საკრებულოში 13 დეპუტატი მმართველი გუნდიდან, 15 კი ოპოზიციიდანაა.

[sknews.ge]