ვანო მერაბიშვილის დედა დირექტორის თანამდებობიდან გაათავისუფლეს

უკვე ყოფილმა დირექტორმა მისი სამსახურიდან გათავისუფლების შესახებ ჯერ არ იცის.

- ”ბრძანება დღეს დილით მივიღეთ, ტელეფონით დავუკავშირდით და ვთხოვეთ, რომ მობრძანდეს. ბრძანებას აქ მოსვლის შემდეგ გავაცნობთ. ჯერ არ მოსულა და არც ხელი მოუწერია”, - ამბობს ახალციხის საგანმანათებლო რესურცენტრის უფროსის მოვალეობის შემსრულებელი დიანა ინასარიძე.

განათლების მინისტრის ბრძანების მოსვლამდე, სამინისტროდან მეხუთე საჯარო სკოლის სამეურვე საბჭომ დირექტორის ხელახლა არჩევის შესახებ წერილი მიიღო.

- ”წერილი ჩვენთან არ მოსულა, პირდაპირ სკოლაში გაგზავნეს. როგორც ვიცი სამეურვეო საბჭომ მერაბიშვილს მხოლოდ გაფრთხილება მისცა და დაკავებულ თანამდებობაზე დატოვა”, - გვიხსნის ინასარიძე.

”სამხრეთის კარიბჭემ” ვითარების გარკვევა სკოლაში დღეს დილით სცადა, თუმცა, იმ მიზეზით, რომ სააღდგომო დღესასწაულების გამო სასწავლო პროცესი შეჩერებულია, სამსახურში არავინ დაგვხვდა.

სატელეფონო საუბარში კი დირექტორის მოადგილემ ნანა დათაშვილმა განგვიმარტა, რომ სამეურვეო საბჭომ სამინისტროდან წერილი ნამდვილად მიიღო, თუმცა, იგი მხოლოდ გაფრთხილებით შემოიფარგლა: ”სამეურვეო საბჭოს წევრი არ ვარ, შესაბამისად წერილს პირადად არ გავცნობივარ. როგორც ვიცი საბჭომ გადაწყვიტა, რომ მხოლოდ გაფრთხილებით შემოფარგლულიყვნენ”.

ჟენია მერაბიშვილის საქმესთან დაკავშირებით განათლების სამინისტრომ მთავარ პროკურატურას 5 მარტს მიმართა. როგორც გუშინ საღამოს ”სამხრეთის კარბიჭეს” მთავარი პროკურატურის პრესამსახურის წარმომადგენელმა ეკა ჩიჩუამ განუმარტა, ამ დრომდე საქმის შესწავლა მიმდინარეობს.

შეგახსენებთ, რომ განათლების სამინისტრომ საქმის მოკვლევა მეხუთე საჯარო სკოლასთან დაკავშირებით ”სამხრეთის კარბიჭის” მიერ გამოქვეყნებული წერილის შემდეგ დაიწყო. ჟენია მერაბიშვილს სკოლის მოსწავლეები და დამლაგებელი ცემაში ადანაშაულებენ.

დიანა ინასარიძის განცხადებით, მერაბიშვილს უფლება აქვს მინისტრის ბრძანება გაასაჩივროს.

[თამუნა უჩიძე, ახალციხე]