რატომ ვერ უყიდა დევნილთა სამინისტრომ აწყურში მეწყერით დაზარალებულ ოჯახს ბინა

ახალციხის მუნიციპალიტეტის გამგეობა სოფელ აწყურში მეწყერით დაზარალებულ თაბაგარების ოჯახს ბინის ქირას იქამდე გადაუხდის, ვიდრე ოჯახი ახალ საცხოვრებელ ფართს არ ნახავს. ამის შესახებ დღეს, 11 დეკემბერს ახალციხის მუნიციპალიტეტის საკრებულოს სხდომაზე გახდა ცნობილი.

როგორც ახალციხის მუნიციპალიტეტის საკრებულოს თავმჯდომარის მოადგილე გელა ნოზაძე ამბობს მეწყერით დაზარალებულ ოჯახისთვის ბინა დევნილთა სამინისტოს უნდა ეყიდა, საცხოვრებელი ფართი თავად ოჯახმა შეარჩია, თუმცა სამინისტრომ იმის, გამო რომ ბინა ავარიული იყო დაიწუნა.

„ამ ოჯახისთვის 20 ათასი ლარის ფარგლებში საცხოვრებელი ბინა დევნილთა სამინისტროს უნდა ეყიდა, მაგრამ როგორც აღმოჩნდა ის ბინა
ავარიული იყო და ამიტომ სამინისტრომ აღარ შეისყიდა. სანამ ახალ ბინას ნახავენ მათ ქირას ისევ გამგეობა გადაუხდის“, – ამბობს გელა ნოზაძე.

იმისთვის, რომ გამგეობამ თაბაგარების ოჯახს ბინის ქირა გადაუხადოს, ახალციხის მუნიციპალიუტეტის 2015 წლის ბიუჯეტში ცვლილების შეტანა გახდა საჭირო.

„ამ ოჯახისთვის ბიუჯეტში 1500 ლარი გავითვალისწინეთ. ერთი წლის განმავლობაში ყოველ თვეში 150 ლარს გადაუხდით“, – ამბობს გელა ნოზაძე.

დევნილთა სამინისტროში აცახდებენ, რომ როგორც კი თაბაგარების ოჯახი სხვა საცხოვრებელ ფართს ნახავს სამხარაულის ექსპერტიზის ბიურო მათ შერჩეულ ბინას შეამოწმებს და დადებითი პასუხის შემთხვევაში სამინისტრო ბინას უყიდის.

„ის ბინა, რომელიც მათ შეარჩიეს, სამხარაულის ექსპერტიზის ბიურომ შეამოწმა და დასკვნაში დაწერა, რომ ბინა ავარიული იყო. როგორც კი ოჯახი სხვა ბინას ნახავს და ექსპერტიზაც დადებს დასკვნას, რომ სახლი მყარია, ამის შემდეგ სამინისტრო მათ ბინას უყიდის“, – ამბობს დევნილთა სამინისტროს საზოგადოებასთან ურთიერთობის სამსახურის წარმომადგენელი დალი გოგოლაძე.

[მანანა სარაშვილი, ახალციხე]